ເປີດໂຕຢ່າງເປັນທາງການເມື່ອວັນທີ 29 ພຶດສະພາ 2019 ຜ່ານມາ ສຳລັບປື້ມປົກຂາວຂອງສະພາການຄ້າ ແລະ ອຸດສາຫະກຳເອີຣົບປະຈຳ ສປປ ລາວ ໂດຍການເຂົ້າຮ່ວມຂອງ ທ່ານ ຣາມອນ ບລູສເລີ ຜູ້ອຳນວຍການສະພາການຄ້າ ແລະ ອຸດສາຫະກຳເອີຣົບ ປະຈຳ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ສຳລັບການເປີດໂຕປື້ມປົກຂາວໃນຄັ້ງນີ້ກໍເພື່ອສະໜອງຂໍ້ມູນ-ຂ່າວສານດ້ານການລົງທຶນ ແລະ ຍຸດທະສາດທຸລະກິດ ລວມເຖິງການລົງທຶນທີ່ຕິດພັນກັບການຮັກສາສິ່ງແວດລ້ອມ ປື້ມປົກຂາວເຫຼັ້ມປະຈຳປີ 2019 ນີ້ຖືເປັນແຫຼ່ງສະໜອງຂໍ້ມູນ-ຂ່າວສານດ້ານການລົງທຶນທຸກຮູບແບບຂອງຊາວຕ່າງປະເທດທີ່ມາລົງທຶນຢູ່ໃນ ສປປ ລາວ.
ທັງນີ້ ປື້ມປົກຂາວເຫຼັ້ມຫຼ້າສຸດນີ້ມີທັງໝົດ 6 ພາກຄື ດັດຊະນີຄວາມສະດວກໃນການດຳເນີນທຸລະກິດ ເສັ້ນທາງລົດໄຟ ວິທີແກ້ໄຂຂໍ້ຂັດແຍ່ງທາງເສດຖະກິດ ດັດຊະນີທຶນຂອງມະນຸດ ການຮ່າງລະບຽບກົດໝາຍ ແລະ ການຫຼຸດຜ່ອນຄວາມສ່ຽງທາງດ້ານເສດຖະ ກິດ ພ້ອມນີ້ ປື້ມປົກຂາວປະຈຳປີ 2019 ຍັງໄດ້ຮວບຮວມບົດລາຍງານຈຳນວນໜຶ່ງ ລວມທັງກົດໝາຍສຳລັບແກ້ໄຂບັນຫາດ້ານເສດຖະກິດທີ່ຖືກປັບປຸງ ແລະ ອື່ນໆ.
ຂ່າວ: ສະຫະລັດ ວອນທິວົງໄຊ