ລາຍງານຂ່າວຕ່າງປະເທດເມື່ອວັນທີ 27 ພຶດສະພາຜ່ານມາໃຫ້ຮູ້ວ່າ ເກີດສະພາບອາກາດປ່ຽນແປງໃນປະເທດຍີ່ປຸ່ນພາຍຫຼັງອຸນຫະພູມເທິງເກາະຮັອກໄກໂດທາງຕອນເໜືອພຸ່ງສູງເຖິງ 39,5 ອົງສາ ຊຶ່ງຖືເປັນຄັ້ງທຳອິດໃນປະຫວັດສາດທີ່ເກາະຮັອກໄກໂດມີອຸນຫະພູມໃນເດືອນພຶດສະພາສູງເກີນ 35 ອົງສາ.
ທ່າມກາງຄວາມວິຕົກກັງວົນວ່າ ຍີ່ປຸ່ນຈະກັບຄືນໄປຜະເຊີນກັບສະພາບອາກາດຮ້ອນເອົ້າຫຼັງຈາກປະສົບໄພຄື້ນຄວາມຮ້ອນຮຸນແຮງເປັນປະຫວັດການເມື່ອລະດູຮ້ອນປີກ່ອນ ສົ່ງຜົນໃຫ້ມີຜູ້ເສຍຊີວິດເຖິງ 138 ລາຍ ແລະ ຫຼາຍກວ່າ 700.000 ຄົນຕ້ອງເຂົ້າປິ່ນປົວໃນໂຮງໝໍ ຂະນະທີ່ສຳນັກອຸຕຸນິຍົມວິທະຍາຍີ່ປຸ່ນໄດ້ອອກມາຖະແຫຼງເມື່ອວັນທີ 26 ພຶດສະພາຜ່ານມາວ່າ ສາມາດວັດ ແທກອຸນຫະພູມສູງສຸດເທິງເກາະຮັອກໄກໂດໃນເມືອງຊາໂຣມະ ທາງຕາເວັນອອກສຽງເໜືອເຖິງ 39,5 ອົງສາຊຶ່ງເປັນໂຕເລກສູງສຸດໃນຮອບ 5 ປີຂອງເກາະຮັອກໄກໂດນັບແຕ່ອຸນຫະພູມສູງສຸດ 37,2 ອົງສາທີ່ວັດແທກໄດ້ໃນເມືອງໂອໂຕຟຸເກະເມື່ອວັນທີ 3 ມິຖຸນາເມື່ອປີ 2013 ແລະ ສູງກວ່າອຸນຫະພູມສູງສຸດທີ່ເຄີຍມີມາຂອງຍີ່ປຸ່ນທີ່ວັດແທກໄດ້ເມື່ອເດືອນພຶດສະພາທີ່ເມືອງຈິຈິບຸ ແຂວງໄຊຕາມະທີ່ວັດແທກໄດ້ 37,2 ອົງສາເມື່ອປີ 1993 ສ່ວນບໍລິສັດເຈອາຣ ຮັອກໄກໂດ ກໍໄດ້ປະກາດໂຈະການບໍລິການລົດໄຟ 40 ຖ້ຽວໃນພື້ນທີ່ພາກຕາເວັນອອກຂອງເກາະຮັອກໄກໂດ ເນື່ອງຈາກຢ້ານວ່າຄວາມຮ້ອນຈະເຮັດໃຫ້ລາງລົດໄຟເກີດຄວາມເສຍຫາຍທີ່ຈະນຳໄປສູ່ການເກີດອຸບັດເຫດ.
ຂະນະທີ່ສຳນັກຂ່າວພາຍໃນກໍໄດ້ລະບຸວ່າ ຈຸດສຳຫຼວດສະພາບອາກາດ 513 ແຫ່ງຈາກທັງໝົດ 926 ແຫ່ງທົ່ວປະເທດກວດພົບອຸນຫະພູມສູງເກີນ 30 ອົງສາ ແລະ ອີກ 53 ແຫ່ງພົບວ່າມີອຸນຫະພູມສູງກວ່າ 35 ອົງສາ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: khaosod