ທະນາຄານ DBS Bank ໄດ້ວິເຄາະວ່າ ເສດຖະກິດຂອງຫວຽດນາມຈະມີຂະໜາດໃຫຍ່ກວ່າເສດຖະກິດຂອງສິງກະໂປພາຍໃນປີ 2029 ຫຼື ອີກປະມານ 20 ປີຂ້າງໜ້າ ເນື່ອງຈາກເສດຖະກິດທີ່ເຕີບໂຕຢ່າງຕໍ່ເນື່ອງ ໂດຍສະເພາະໃນປັດຈຸບັນຫວຽດນາມໄດ້ຮັບອານິສົງຈາກສົງຄາມການຄ້າລະຫວ່າງຈີນ ແລະ ອາເມຣິກາ ຊຶ່ງໄດ້ສົ່ງຜົນໃຫ້ອາເມຣິກາຫັນມານຳເຂົ້າສິນຄ້າຂອງຫວຽດນາມແທນສິນຄ້າຈາກຈີນ ຂະນະທີ່ການລົງທຶນຈາກແຫຼ່ງຕ່າງໆກໍຫຼັ່ງໄຫຼເຂົ້າສູ່ຫວຽດນາມເພີ່ມຂຶ້ນເລື້ອຍໆ.
ຂະນະທີ່ລາຍງານຂ່າວຂອງ Bloomberg ພົບວ່າ ອາເມຣິການຳເຂົ້າສິນຄ້າຈາກຫວຽດ ນາມເພີ່ມຂຶ້ນເຖິງ 40,2% ໃນໄລຍະໄຕມາດທຳອິດຂອງປີ 2019 ເມື່ອທຽບກັບໄລຍະດຽວກັນຂອງປີ 2018 ຂະນະທີ່ອາເມຣິການຳເຂົ້າສິນຄ້າຈາກຈີນຫຼຸດລົງ 13,9% ຊຶ່ງເຮັດໃຫ້ຫວຽດນາມແຊງໜ້າອັງກິດຂຶ້ນມາຢູ່ໃນອັນດັບທີ 7 ຂອງປະເທດທີ່ສົ່ງອອກສິນຄ້າໄປອາເມຣິກາຫຼາຍທີ່ສຸດ.
ໂດຍປັດໄຈອື່ນໆທີ່ຈະເຮັດໃຫ້ຫວຽດນາມກ້າວຂຶ້ນມາເປັນມະຫາອຳນາດເສດຖະກິດໃໝ່ຂອງພູມີພາກກໍຄື ຄ່າແຮງຕ່ຳ ຊຶ່ງໃນເວລານີ້ຄ່າແຮງຂອງຫວຽດນາມມີມູນຄ່າພຽງ 1 ໃນ 3 ຂອງຄ່າແຮງໃນ ສປ ຈີນ ແລະ ເປັນສິ່ງດຶງດູດໃຫ້ພາກການຜະລິດຍ້າຍຖານມາຍັງ ສສ ຫວຽດນາມ ທີ່ສຳຄັນອີກໜຶ່ງກໍຄື ໃນການຈັດອັນດັບດັດຊະນີທຶນມະນຸດ ຫຼື Human Capital Index ຊຶ່ງຈັດໂດຍທະນາຄານໂລກພົບວ່າ ຫວຽດນາມມີຕົ້ນທຶນມະນຸດສູງທີ່ສຸດເປັນອັນດັບ 2 ຂອງອາຊຽນ ແລະ ຍັງມີປະຊາກອນໄວໜຸ່ມທີ່ມີອາຍຸສະເລ່ຍ 30 ປີເປັນຈຳນວນຫຼາຍ ຊຶ່ງຈະກາຍເປັນກຳລັງສຳຄັນໃນການຊຸກຍູ້ເສດຖະກິດໃນອະນາຄົດ.
ສ່ວນປະເທດທີ່ມີຂະໜາດເສດຖະກິດໃຫຍ່ທີ່ສຸດໃນອາຊີຕາເວັນອອກສຽງໃຕ້ກໍຄື ອິນໂດເນເຊຍ ມີມູນຄ່າ 963,648 ລ້ານໂດລາ ຮອງລົງມາກໍຄື ປະເທດໄທ ມີມູນຄ່າ 409,842 ລ້ານໂດລາ ສ່ວນອັນດັບ 3 ແມ່ນຟີລິບປິນ ມີມູນຄ່າ 369,108 ລ້ານໂດລາຈາກໂຕເລກ IMF ເມື່ອປີ 2016 ຂະນະທີ່ມາເລເຊຍຢູ່ໃນອັນດັບທີ 4 ອັນດັບທີ 5 ແມ່ນສິງກະໂປ ແລະ ອັນດັບທີ 6 ແມ່ນປະເທດຫວຽດນາມ.
ນອກນີ້ ຖ້າຫາກເສດຖະກິດ ແລະ ການພັດທະນາປະເທດມີການຂະຫຍາຍຕົວ ຫວຽດນາມຈະບໍ່ສາມາດຮັກສາທ່າແຮງດ້ານການແຂ່ງຂັນເລື່ອງຄ່າແຮງຕ່ຳໄດ້ອີກຕໍ່ໄປ ແລະ ຈະຖືກບີບໃຫ້ພັດທະນາເຕັກໂນໂລຊີຂອງຕົນເອງໃຫ້ກ້າວຂຶ້ນໄປພ້ອມໆກັນ ຊຶ່ງຖ້າຫາກເຮັດບໍ່ ສຳເລັດຈະຕ້ອງຕົກທ່າຮັບປະເທດທີ່ມີລາຍຮັບປານກາງໄປອີກຫຼາຍປີ ທັງນີ້ ຊາວຫວຽດນາມຖືເປັນຜູ້ບໍລິໂພກທີ່ມີຊາດນິຍົມສູງ ແລະ ຈະຊື້ສິນຄ້າພາຍໃນປະເທດເປັນສ່ວນໃຫຍ່.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday