ນັກໂທດຕ່າງແກ້ງຍົກຂະບວນຈະລາຈົນໃນຄຸກ 4 ແຫ່ງຂອງເມືອງມາເນົາສ ທາງຕາເວັນຕົກສຽງເໜືອຂອງບຣາຊິນ ສົ່ງຜົນໃຫ້ຄົນເສຍຊີວິດ 57 ລາຍ ໃນນັ້ນ ພົບສົບ 15 ລາຍເມື່ອວັນທີ 26 ພຶດສະພາ ແລະ ພົບອີກຢ່າງໜ້ອຍ 42 ສົບເມື່ອວັນທີ 28 ພຶດສະພາຜ່ານມາ.
ສຳນັກຂ່າວຕ່າງປະເທດລາຍງານຈາກນະຄອນຣິໂອເດຈາເນໂຣເມື່ອວັນທີ 28 ພຶດສະພາວ່າ ຖະແຫຼງການຂອງສຳນັກງານເຮືອນຈຳ ລັດອາມາໂຊນາສ ໄດ້ໃຫ້ຮູ້ວ່າ ເກີດເຫດຜິດຖຽງກັນລະຫວ່າງກຸ່ມນັກໂທດພາຍໃນຄຸກອານິຊິໂອ ໂຈບິມ ໃນເມືອງມາເນົາສ ເມືອງເອກຂອງລັດອາມາໂຊນາສ ເຫດການດັ່ງກ່າວເກີດຂຶ້ນຕອນທ່ຽງຂອງວັນທີ 26 ພຶດສະພາຜ່ານມາ ໂດຍເຈົ້າໜ້າທີ່ເຮືອນຈຳໄດ້ຂໍກຳລັງເສີມຈາກໜ່ວຍຄວາວມໝັ້ນຄົງຂອງລັດ ຊຶ່ງສາມາດຄວບຄຸມສະຖານະການໄດ້ພາຍໃນ 45 ນາທີ ແລະ ການກວດສອບຫຼັງເຫດການສະຫງົບກໍພົບວ່າ ມີນັກໂທດ 15 ລາຍສາຍຊີວິດ ໃນນັ້ນ ຫຼາຍຄົນຖືກແທງດ້ວຍດ້າມໄມ້ຖູແຂ້ວທີ່ຖືກດັດແປງໃຫ້ເປັນອາວຸດ ສ່ວນທີ່ເຫຼືອຖືກຮັດຄໍ ແລະ ໄດ້ຮັບບາດເຈັບຫຼາຍກວ່າ 10 ຄົນ.
ຂະນະທີ່ໂຄສົກສຳນັກງານເຮືອນຈຳລັດອາມາໂຊນາສກໍໄດ້ເປີດເຜີຍຕື່ມວ່າ ໄດ້ຮັບແຈ້ງວ່າມີນັກໂທດເສຍຊີວິດເພີ່ມຢ່າງໜ້ອຍ 42 ລາຍເມື່ອວັນຈັນທີ 27 ພຶດສະພາໃນເຮືອນຈຳ 3 ແຫ່ງຂອງເມືອງມາເນົາສຄື ອັນໂຕນິໂອ ຕຣິນດາເດ ປາຣາເກີກົວຣາ ແລະ ສູນກັກກັນຊົ່ວຄາວລັດອາມາໂຊນາສ ທັງນີ້ ສຳນັກງານກໍໄດ້ຕັ້ງຄະນະກຳມະການສອບສວນຫາສາເຫດຄວາມຮຸນແຮງທີ່ເກີດຂຶ້ນໃນເຮືອນຈຳທັງ 4 ແຫ່ງ.
ທັງນີ້ ເມື່ອເດືອນມັງກອນ 2017 ທີ່ຜ່ານມາ ກໍມີເຫດການນັກໂທດຕ່າງແກ້ງຍົກພວກຕະ ລຸມບອນກັນໃນເຮືອນຈຳຫຼາຍແຫ່ງໃນເມືອງມາເນົາສ ຕະຫຼອດໄລຍະ 3 ອາທິດມີນັກໂທດເສຍຊີວິດ 150 ລາຍ ລວມເຖິງ 60 ລາຍໃນເຮືອນຈຳອານິຊິໂອ ໂຈບິມ ທັງນີ້ ບຣາຊິນຖືເປັນປະເທດທີ່ມີປະຊາກອນນັກໂທດຫຼາຍເປັນອັນດັບ 3 ຂອງໂລກ ຮອງຈາກອາເມຣິກາ ແລະ ຈີນ ຊຶ່ງໂຕເລກຫຼ້າສຸດໃນເດືອນເມສາ 2019 ມີທັງໝົດ 712.305 ຄົນ ຊຶ່ງມີຈຳນວນຫຼາຍເກືອບ 2 ເທົ່າທີ່ເຮືອນຈຳທົ່ວປະເທດຈະສາມາດຮອງຮັບໄດ້.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AP