ບໍລິສັດຮົວເຫວີຍ ສປ ຈີນ ປະກາດທົບທວນຄວາມຮ່ວມມືກັບບໍລິສັດຂົນສົ່ງລະດັບໂລກຄື ເຟສເອັກໃນອາເມຣິກາ ພາຍຫຼັງໄດ້ຮັບລາຍງານການປ່ຽນເສັ້ນທາງຂົນສົ່ງວັດສະດຸຂອງຮົວເຫວີຍ.

ທ່ານ ໂຈ ເຄລລີ ໂຄສົກຂອງບໍລິສັດຮົວເຫວີຍປະຈຳພາກພື້ນອາເມຣິກາກ່າວວ່າ ຄະນະຜູ້ບໍລິຫານຂອງຮົວເຫວີຍມີມະຕິທົບທວນຄືນຄວາມຮ່ວມມືທາງທຸລະກິດ ແລະ ຄວາມສຳພັນກັບບໍລິສັດເຟສເອັກຊຶ່ງເປັນຜູ້ໃຫ້ບໍລິການດ້ານຂົນສົ່ງ ແລະ ຈັດສົ່ງສິນຄ້າດ່ວນລະຫວ່າງປະເທດລາຍໃຫຍ່ຂອງອາເມຣິກາ ເນື່ອງຈາກໄດ້ຮັບລາຍງານວ່າ ເຟສເອົັກປ່ຽນເສັ້ນທາງຈັດສົ່ງວັດສະດຸ 2 ຫໍ່ ຊຶ່ງມີປາຍ ທາງໄປຍັງສຳນັກງານຂອງຮົວເຫວີຍໃນອາຊີ ໜຶ່ງໃນນັ້ນກໍຄືສຳນັກງານທີ່ຫວຽດນາມໄປຍັງສະຖານທີ່ແຫ່ງໜຶ່ງໃນອາເມຣິກາ ແລະ ຍັງພະຍາຍາມປ່ຽນເສັ້ນທາງສົ່ງວັດສະດຸທີ່ມີປາຍທາງໄປຍັງຮົວເຫວີຍໃນອາຊີອີກ 2 ຫໍ່.

ສະຖານະການດັ່ງກ່າວເກີດຂຶ້ນເກືອບ 2 ອາທິດຫຼັງກະຊວງອຸດສາຫະກຳໃນນະຄອນວໍຊີງຕັນຂຶ້ນບັນຊີດຳບໍລິສັດຮົວເຫວີຍເມື່ອວັນທີ 17 ພຶດສະພາຜ່ານມາຕາມຄຳສັ່ງສະຖານະການສຸກເສີນດ້ານເຕັກໂນໂລຊີຂອງປະທານາທິບໍດີ ໂດນັລ ທຣັມ ແຕ່ຍັງມີເວລາຜ່ອນ ຜັນ 90 ວັນໃຫ້ກັບຮົວເຫວີຍ ແລະ ບໍລິສັດຄູ່ຄ້າໃນອາເມຣິກາສຳລັບຈັດການທຸລະກຳ ແລະ ຂໍ້ຕົກລົງທີ່ຍັງຄ້າງຄາໃຫ້ສຳເລັດ ຢ່າງ ໃດກໍຕາມ ມີການວິເຄາະວ່າ ລັດຖະບານວໍຊີງຕັນອາດຂະຫຍາຍເວລາຜ່ອນຜັນຕື່ມອີກໃນອະນາຄົດ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: REUTERS