ເມື່ອເວລາປະມານ 8:30 ໂມງ (ຕາມເວລາທ້ອງຖິ່ນ) ຂອງວັນທີ 25 ພຶດສະພາຜ່ານມາ ໄດ້ເກີດເຫດເສົ້າສະຫຼົດເມື່ອຊາຍຊາວອາເມຣິກາໄວ 65 ປີຖືກສະຫຼາມຈູ່ໂຈມ (ກັດ) ຈົນເສຍຊີວິດຂະນະລົງຫຼິ້ນນ້ຳທະເລທີ່ຫາດ Kaanapali ນອກແຄມຝັ່ງເກາະເມົາວີ ຊຶ່ງເປັນເກາະຂະໜາດໃຫຍ່ອັນດັບສອງຂອງລັດຮາວາຍ ແລະ ຖືເປັນເຫຍື່ອລາຍທຳອິດທີ່ຖືກສະຫຼາມກັດໃນຮອບ 4 ປີຂອງລັດດັ່ງກ່າວ.
ເຫດການດັ່ງກ່າວເກີດຂຶ້ນຂະນະທີ່ຊາຍຄົນດັ່ງກ່າວລົງຫຼິ້ນນ້ຳຫ່າງຈາກແຄມຝັ່ງປະມານ 50 ແມັດ ຂະນະທີ່ຜູ້ຊ່ຽວຊານກ່ຽວກັບສະຫຼາມໄດ້ອອກມາເປີດເຜີຍວ່າ ສະຫຼາມທີ່ທຳຮ້າຍຊາຍຄົນນີ້ຈົນເຖິງຂັ້ນເສຍຊີວິດແມ່ນສະຫຼາມເສືອ ຊຶ່ງເປັນສາຍພັນສະຫຼາມທີ່ດຸຮ້າຍທີ່ສຸດ.
ລາຍງານຂ່າວດຽວກັນລະບຸອີກວ່າ ເຈົ້າໜ້າທີ່ຍັງບໍ່ໄດ້ເປີດເຜີຍຊື່ຂອງຜູ້ເຄາະຮ້າຍລາຍນີ້ ບອກພຽງວ່າຊາຍຄົນດັ່ງກ່າວຖືກສະຫຼາມທຳຮ້າຍຈົນໄດ້ຮັບບາດເຈັບສາເຫັດ ແລະ ຖືກຊ່ວຍປະຖົມພະຍາບານຂັ້ນພື້ນຖານດ້ວຍການປ້ຳຫົວໃຈ (CPR) ກູ້ຊີບພາຍຫຼັງທີ່ຖືກນຳຂຶ້ນຈາກນ້ຳ ແຕ່ກໍບໍ່ສາມາດຊ່ວຍຊີວິດຊາຍຄົນນີ້ໄດ້.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: ໄທຣັດ