ສຳນັກຂ່າວຕ່າງປະເທດລາຍງານຈາກນະຄອນຫຼວງຮ່າໂນ້ຍ ສສ ຫວຽດນາມ ເມື່ອວັນທີ 27 ພຶດສະພາ 2019 ວ່າ ກະຊວງກະສິ ກຳຂອງຫວຽດນາມອອກຖະແຫຼງການເມື່ອວັນຈັນ ເລື່ອງການຂ້າໝູໃນປະເທດຫຼາຍກວ່າ 500.000 ໂຕພາຍໃນໄລຍະເວລາ 2 ອາທິດທີ່ຜ່ານມາ ຊຶ່ງໄດ້ເພີ່ມຈຳນວນໝູທີ່ຈຳເປັນຕ້ອງຂ້ານັບຕັ້ງແຕ່ພົບການແຜ່ລະບາດຂອງພະຍາດອະຫິວາໝູອາຟຣິກາ (ASF) ໃນປະເທດ ລວມແລ້ວຫຼາຍກວ່າ 1.7 ລ້ານໂຕ ເທົ່າເທົ່າ 5% ຂອງໝູທັງໝົດໃນປະເທດ.
ເຖິງແມ່ນວ່າຈະບໍ່ມີຫຼັກຖານຢືນຢັນທີ່ຊັດເຈນວ່າ ພະຍາດອະຫິວາໝູອາຟຣິກາສາມາດແຜ່ລະບາດຈາກໝູສູ່ຄົນ ຫຼື ລະຫວ່າງຄົນກັບຄົນ ແຕ່ທາງພາກລັດກໍມີຄວາມກັງວົນທີ່ປະຊາຊົນຊາວຫວຽດນາມສ່ວນໃຫຍ່ມັກບໍລິໂພກຊີ້ນໝູທີ່ລ້ຽງ ແລະ ຜະລິດເອງໃນປະເທດຫຼາຍກວ່າຊີ້ນໝູທີ່ນຳເຂົ້າຈາກເອີຣົບ ອາເມລິກາ ແລະ ອົດສະຕຣາລີ.
ຂະນະທີ່ສະຖານະການແຜ່ລະບາດຂອງພະຍາດອະຫິວາໝູຂະຫຍາຍອອກໃນວົງກວ້າງແລ້ວ 42 ແຂວງຈາກ 58 ແຂວງ ດ້ານອົງ ການອາຫານ ແລະ ກະສິກຳແຫ່ງສະຫະປະຊາຊາດ (FAO) ກໍເຄີຍສົ່ງໜັງສືເຖິງລັດຖະບານຫວຽດນາມເມື່ອເດືອນມີນາທີ່ຜ່ານມາ ໂດຍໄດແນະນຳໃຫ້ປະກາດສະຖານະການສຸກເສີນການແຜ່ລະບາດຂອງພະຍາດ ASF ແຕ່ຍັງບໍ່ຊັດເຈນວ່າມີການຕອບສະໜອງຫຼາຍໜ້ອຍພຽງໃດ ສ່ວນສິງກະໂປໄດ້ປະກາດໂຈະນຳເຂົ້າຊີ້ນໝູຈາກຫວຽດນາມຊົ່ວຄາວ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ເດລີນິວ