3 ສາຍການບິນຍັກໃຫຍ່ຂອງ ສປ ຈີນຄື ແອຣໄຊນາ ໄຊນາ ເຊົາເທີຣນ ແອຣລາຍ ແລະ ໄຊນາ ອິສເທິຣນ ແອຣລາຍ ເດີນໜ້າຟ້ອງຮ້ອງຮຽກຄ່າເສຍຫາຍຈາກບໍລິສັດໂບອິງຂອງອາເມຣິກາ ກໍລະນີທີ່ໂບອິງມີຄຳສັ່ງໂຈະການໃຊ້ງານເຮືອບິນລຸ້ນ 737 MAX ທີ່ພົບບັນຫາດ້ານຄວາມປອດໄພ ອັນໄດ້ສົ່ງຜົນໃຫ້ເຮືອບິນລຸ້ນ 737 max 8 ຂອງສາຍການບິນເອທິໂອປຽນ ແອຣລາຍ ແລະ ສາຍການບິນ ໄລອອນ ແອຣ ປະສົບອຸບັດເຫດຈົນມີຜູ້ເສຍຊີວິດເຖິງ 346 ລາຍ.
ສຳລັບສາຍການບິນ ໄຊນາ ອິສເທີຣນ ກໍໄດ້ລະບຸວ່າ ໄດ້ຍື່ນຄຳຮ້ອງໄປຍັງບໍລິສັດໂອອິງແລ້ວ ແຕ່ບໍ່ໄດ້ເປີດເຜີຍຕົວເລກຈຳນວນເງິນຄ່າເສຍຫາຍທີ່ຕ້ອງການໃຫ້ໂບອິງຊົດເຊີຍ ໂດຍສາຍການບິນ ໄຊນາ ອິສເທີຣນ ມີເຮືອບິນລຸ້ນດັ່ງກ່າວປະຈຳການ 14 ລຳ ຂະນະທີ່ສາຍການບິນ ໄຊນາ ເຊົາເທີຣນ ມີເຖິງ 24 ລຳ ແລະ ສາຍການເບິນ ແອຣໄຊນາ ມີ 15 ລຳ.
ທັງນີ້ ທັງ 3 ສາຍການບິນໄດ້ຖືກໂບອິງສັ່ງໂຈະໃຊ້ງານຈົນກວ່າຈະມີການປ່ຽນແປງດ້ານຄວາມປອດໄພ ຊຶ່ງໄດ້ສົ່ງຜົນໃຫ້ສາຍການບິນໄດ້ຮັບຄວາມເສຍຫາຍຈາກກໍລະນີທີ່ບໍ່ສາມາດນຳເຮືອບິນລຸ້ນດັ່ງກ່າວທີ່ເຂົ້າມາປະຈຳການໃນຝູງບິນອອກໃຫ້ບໍລິການແກ່ຜູ້ໂດຍສານ.
ການສັ່ງໂຈະໃຊ້ງານເຮືອບິນລຸ້ນ 737 MAX ທຸກລຳທີ່ເຂົ້າປະຈຳການໃນສາຍການບິນຕ່າງໆທົ່ວໂລກແມ່ນໄດ້ຖືກນັກວິເຄາະປະເມີນວ່າ ເຫດການດັ່ງກ່າວໄດ້ສ້າງຄວາມເສຍຫາຍໃຫ້ກັບສາຍການບິນຕ່າງໆຊຶ່ງຄິດເປັນມູນຄ່າລວມຫຼາຍຮ້ອຍລ້ານໂດລາແລ້ວ ທັງນີ້ ໂບອິງໄດ້ມອບຄືນເຮືອບິນລຸ້ນດັ່ງກ່າວແລ້ວເຖິງ 393 ລຳ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday