ທ່ານ ນະເຣາທຣາ ໂມດີ ປະກາດໄຊຊະນະການເລືອກຕັ້ງທົ່ວໄປແລ້ວ ຫຼັງຈາກຜົນການນັບຄະແນນຢ່າງບໍ່ເປັນທາງການອອກມາວ່າ ພັກຂອງ ໂມດີ ໄດ້ຄະແນນສຽງຫຼາຍກວ່າພັກຄູ່ແຂ່ງຢ່າງຖະຫຼົ່ມຖະລາຍ.
ສຳນັກຂ່າວຕ່າງປະເທດລາຍງານເມື່ອວັນທີ 23 ພຶດສະພາຜ່ານມາວ່າ ທ່ານ ນະເຣນທຣາ ໂມດີ ນາຍົກລັດຖະມົນຕີຂອງອິນເດຍໄດ້ອອກມາປະກາດໄຊຊະນະການເລືອກຕັ້ງທົ່ວໄປຄັ້ງໃຫຍ່ທີ່ສຸດໃນໂລກ ຊຶ່ງໄດ້ເລີ່ມມາແຕ່ຕົ້ນເດືອນເມສາຜ່ານມາ ພາຍຫຼັງທີ່ຜົນນັບຄະແນນຢ່າງບໍ່ເປັນທາງການອອກມາວ່າ ພັກ BJP ໄດ້ຄະແນນສຽງຖະຫຼົ່ມຖະລາຍຊຶ່ງສາມາດຍາດບ່ອນນັ່ງໃນລັດຖະສະພາໄດ້ເຖິງ 300 ບ່ອນນັ່ງຈາກທັງໝົດ 543 ບ່ອນນັ່ງ ທັງນີ້ ຈິ່ງສົ່ງຜົນໃຫ້ ທ່ານ ນະເຣນທຣາ ໂມດີ ໄດ້ເປັນນາຍົກລັດຖະມົນຕີຕໍ່ໄປເປັນເວລາ 5 ປີ.
ໂດຍການເລືອກຕັ້ງໃຫຍ່ທົ່ວໄປຂອງອິນເດຍໄດ້ເລີ່ມມາແຕ່ຕົ້ນເດືອນເມສາຫາວັນທີ 19 ພຶດສະພາ 2019 ຜ່ານມາ ໂດຍມີຜູ້ທີ່ມີສິດເລືອກຕັ້ງເຖິງ 600 ລ້ານຄົນ ຖືວ່າເປັນການເລືອກຕັ້ງຄັ້ງໃຫຍ່ທີ່ສຸດໃນໂລກ ແລະ ຖືກຄາດຄະເນວ່າເປັນການລົງປະຊາມະຕິທາງອ້ອມວ່າ ປະຊາຊົນຍອມຮັບນະໂຍບາຍສາຍຊາດນິຍົມຂອງ ໂມດີ ຫຼື ບໍ່? ຊຶ່ງຜົນທີ່ອອກມາກໍປາກົດວ່າ ໂມດີ ບໍ່ພຽງແຕ່ເຮັດໄດ້ເກີນຄາດໝາຍຂອງເອັກຊິດໂພ ແຕ່ຍັງໄດ້ຄະແນນໂຫວດຫຼາຍກວ່າການເລືອກຕັ້ງເມື່ອປີ 2014 ອີກດ້ວຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: ໄທຣັດ