ສຳນັກຂ່າວຕ່າງປະເທດລາຍງານຈາກນະຄອນວໍຣຊໍ ປະເທດໂປແລນເມື່ອວັນທີ 21 ພຶດສະພາຜ່ານມາວ່າ ແມ່ຍິງຊາວໂປແລນຊື່ວ່າ ນາງ ຄລໍເດຍ ມາຣເຊັກ ໄວ 29 ປີໄດ້ໃຫ້ກຳເນີດລູກແຝດເຖິງ 6 ຄົນ ໃນນັ້ນ ມີເພດຊາຍ 2 ຄົນ ແລະ ເພດຍິງ 4 ຄົນດ້ວຍວິທີຜ່າຕັດຢູ່ທີ່ໂຮງໝໍໃນເມືອງຄຣາເຄົາ ທາງພາກໃຕ້ຂອງໂປແລນ.
ດຣ ໄຣສຊາຣດ ເລົາເທີຣບາກ ທ່ານໝໍປະຈຳໂຮງໝໍມະຫາວິທະຍາໄລໃນເມືອງດັ່ງກ່າວໄດ້ເປີດເຜີຍວ່າ ເດັກອ່ອນແຝດ 6 ຄົນທີ່ຄອດອອກມາແມ່ນສົມບູນປອດໄພ ແຕ່ລະບົບທາງເດີນຫາຍໃຈ ປະສາດ ແລະ ລະບົບຍ່ອຍອາຫານຍັງບໍ່ສົມບູນເຕັມທີ່ ຈິ່ງຕ້ອງຢູ່ພາຍໃຕ້ການດູແລຂອງທີມແພດຢ່າງໃກ້ຊິດ.
ຂະນະທີ່ ນາງ ມາຣເຊັກ ໄດ້ກ່າວວ່າ ຄອບຄົວບໍ່ໄດ້ຄາດຫວັງວ່າຈະໄດ້ລູກແຝດເຖິງ 6 ຄົນ ຊຶ່ງຫວັງພຽງວ່າຈະມີແຝດ 5 ຄົນເທົ່ານັ້ນ ແລະ ນີ້ກໍຖືເປັນເລື່ອງທີ່ມະຫັດສະຈັນທີ່ສຸດທີ່ຄອບຄົວຂອງເຮົາມີສະມາຊິກໃໝ່ເຖິງ 6 ຄົນ ຊຶ່ງເລື່ອງທີ່ພິເສດແບບນີ້ແມ່ນມີໂອກາດເກີດຂຶ້ນພຽງແຕ່ 1 ໃນ 4.700 ເປີເຊັນເທົ່ານັ້ນ.
ທັງນີ້ ທ່ານ ດຣ ມາຣຊິນ ເຈໄດຣເຊົາສະກີ ຜູ້ອຳນວຍການໂຮງໝໍໄດ້ກ່າວວ່າ ການຄອດເປັນໄປດ້ວຍຄວາມຫຍຸ້ງຍາກ ເພາະຕ້ອງໄດ້ລະດົມທີມແພດ ແລະ ເຈົ້າໜ້າທີ່ດ້ານການແພດປະມານ 40 ຄົນ ຂະນະທີ່ເດັກອ່ອນເພດຍິງຄົນທີ 6 ກໍໄດ້ສຳຜັດກັບຜູ້ໃຫ້ກຳເນີດກ່ອນທີ່ຈະຖືກນຳຕົວໄປຢູ່ຕູ້ອົບສຳເລັດເດັກອ່ອນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AP