ທະນາຄານແຫ່ງ ສປປ ລາວ ໄດ້ອອກປະກາດເຕືອນຕໍ່ສາທາລະນະເລື່ອງການລົງທຶນກ່ຽວກັບສະກຸນເງິນດິຈິຕອລ ຊຶ່ງປະກາດດັ່ງກ່າວມີຂຶ້ນຫຼັງຈາກທີ່ເວັບໄຊກະດານຊື້-ຂາຍ Bitcoin ແຫ່ງທຳອິດຂອງລາວທີ່ມີຊື່ວ່າ Bitsabuy (ບິດສະບາຍ) ເປີດຕົວຢ່າງເປັນທາງການເມື່ອບໍ່ດົນມານີ້.
ທັງນີ້ ທະນາຄານແຫ່ງ ສປປ ລາວ ໃຫ້ຮູ້ວ່າ ການເຮັດທຸລະກຳໃດໆທີ່ກ່ຽວກັບ Cryptocurrency ໃນປະເທດຖືເປັນສິ່ງທີ່ຜິດກົດໝາຍ ຊຶ່ງກ່ອນໜ້ານີ້ທະນາຄານກາງກໍໄດ້ສັ່ງໂຈະບໍ່ໃຫ້ສະຖາບັນການເງິນໃດກໍຕາມທີ່ມີສ່ວນກ່ຽວຂ້ອງກັບ Cryptocurrency ແລະ ເຮັດການລົງທຶນກ່ຽວກັບຫຼຽນ Bitcoin ແລະ ອື່ນໆ.
ສາເຫດຫຼັກກໍຄື ທະນາຄານແຫ່ງ ສປປ ລາວ ມີຄວາມວິຕົກກັງວົນວ່າຈະເກີດການເຮັດທຸລະກຳແບບທີ່ບໍ່ສາວມາດເຜີຍຕົວຕົນໄດ້ ຊຶ່ງຈະເປັນການເພີ່ມຄວາມສ່ຽງໃນການໃຊ້ສິນຊັບດິຈິຕອລ ລວມເຖິງໃນມຸມຂອງການຟອກເງິນອີກດ້ວຍ ນອກນີ້ ລັດຖະບານຍັງບໍ່ມີລະບົບປ້ອງກັນຄວາມປອດໄພທີ່ຮັດກຸມສຳລັບປົກປ້ອງນັກລົງທຶນ.
ຂະນະດຽວກັນ ເວັບໄຊກະດານຊື້-ຂາຍຄຣິບໂຕແຫ່ງທຳອິດຂອງລາວ Bitsabuy ຊຶ່ງເປີດຕົວເມື່ອບໍ່ດົນມານີ້ ຊຶ່ງປັດຈຸບັນເວັບດັ່ງກ່າວເປີດໃຫ້ບໍລິການຊື້-ຂາຍຫຼຽນ BTC ETH ATO ແລະ ອື່ນໆ ໂດຍໃຫ້ບໍລິການຊື້-ຂາຍຄູ່ກັບເງິນກີບ ແລະ ນັກລົງທຶນສາມາດທີ່ຈະຝາກຖອນເປັນເງິນຫຼຽນຄຣິບໂຕ ຫຼື ເງິນກີບໄດ້.
ທັງນີ້ ໂດຍປົກກະຕິແລ້ວ ກ່ອນໜ້າທີ່ຈະມີເວັບໄຊຊື້-ຂາຍນັ້ນ ປະຊາຊົນລາວສ່ວນໃຫຍ່ຈະຊື້-ຂາຍກັນແບບສ່ວນຕົວ ແຕ່ຫຼັກໆຈະໄປຊື້-ຂາຍຢູ່ເວັບໄຊຂອງໄທເພາະວ່າຢູ່ໃກ້ທີ່ສຸດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: siamblockchain.com