ລັດຖະມົນຕີກະຊວງສິ່ງແວດລ້ອມຂອງມາເລເຊຍໃຫ້ຮູ້ວ່າ ມາເລເຊຍຈະສົ່ງຄືນຂີ້ເຫຍື້ອພລາສຕິກຊຶ່ງສ່ວນໃຫຍ່ເປັນຂີ້ເຫຍື້ອພລາສຕິກທີ່ບໍ່ສາມາດນຳມາຣີໄຊເຄິລໄດ້ກັບໄປຍັງປະເທດຕົ້ນທາງ ຊຶ່ງສ່ວນໃຫຍ່ເປັນປະເທດທີ່ພັດທະນາແລ້ວ.
ຊຶ່ງເມື່ອປີຜ່ານມາ ມາເລເຊຍກາຍເປັນຈຸດໝາຍປາຍທາງສຳລັບຂີ້ເຫຍື້ອພລາສຕິກທີ່ຖືກນຳມາຖິ້ມເພື່ອຣີໄຊເຄິລ ຫຼັງຈາກທີ່ທາງການຈີນໄດ້ສັ່ງໂຈະການຂົນຂີ້ເຫຍື້ອພລາສຕິກມາຖິ້ມໃນປະເທດ ໂດຍພົບວ່າມາເລເຊຍກາຍເປັນປາຍທາງຂອງຂີ້ເຫຍື້ອພລາສຕິກປະມານ 7 ລ້ານໂຕນຕໍ່ປີ.
ທັງນີ້ ທຸລະກິດໂຮງງານຣີໄຊເຄິລພລາສຕິກໃນມາເລເຊຍຫຼາຍສິບແຫ່ງຊຶ່ງບໍ່ມີໃບອະນຸຍາດຈາກທາງການ ແລະ ຜູ້ປະກອບການຫຼາຍແຫ່ງໄດ້ປ່ອຍປະ ແລະ ເມີນເສີຍຕໍ່ຜົນກະທົບດ້ານສິ່ງແວດລ້ອມໃນຂະບວນການຣີໄຊເຄິລ.
ຂະນະທີ່ຂີ້ເຫຍື້ອພລາສຕິກສ່ວນໃຫຍ່ທີ່ນຳເຂົ້າມາສ່ວນໃຫຍ່ມາຈາກປະເທດທີ່ພັດທະນາແລ້ວ ແລະ ສ່ວນຫຼາຍແມ່ນມີການປົນເປື້ອນ ລວມເຖິງເປັນຂີ້ເຫຍື້ອພລາສຕິກຄຸນນະພາບຕ່ຳທີ່ບໍ່ສາມາດນຳມາຣີໄຊເຄິລຄືນໄດ້ ດັ່ງນັ້ນ “ທາງການມາເລເຊຍຈະໄດ້ເລີ່ມຂະບວນການສົ່ງຂີ້ເຫຍື້ອເຫຼົ່ານີ້ກັບໄປຍັງປະເທດຕົ້ນທາງ” ທ່ານ Yeo Bee Yin ລັດຖະມົນຕີສິ່ງແວດລ້ອມຂອງມາເລເຊຍກ່າວ.
ຢ່າງໃດກໍຕາມ “ປະເທດທີ່ພັດທະນາແລ້ວຈະຕ້ອງຮັບຜິດຊອບຕໍ່ສິ່ງທີ່ເຂົາເຈົ້າສົ່ງອອກມາ” ຊຶ່ງຂີ້ເຫຍື້ອພລາສຕິກບາງສ່ວນທີ່ຖືກສົ່ງມາພົບວ່າລະເມີດອະນຸສັນຍາບາເຊິລທີ່ລະບຸວ່າ “ຫ້າມສົ່ງຂີ້ເຫຍື້ອມາຖິ້ມໃນປະເທດກຳລັງພັດທະນາ ຫຼື ປະເທດດ້ອຍພັດທະນາ” ທັງນີ້ ມາເລເຊຍໄດ້ສົ່ງຂີ້ເຫຍື້ອປົນເປື້ອນປະມານ 5 ຕູ້ຄອນເທັນເນີກັບໄປຍັງປະເທດແອັດສະປາຍ ຊຶ່ງເປັນປະເທດຕົ້ນທາງແລ້ວ ແລະ ສ່ວນທີ່ເຫຼືອແມ່ນຢູ່ໃນຂັ້ນຕອນດຳເນີນການ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ:posttoday