ສຳນັກຂ່າວຕ່າງປະເທດລາຍງານຈາກນະຄອນດູຊານເບ ປະເທດທາຈິກິສຖານເມື່ອວັນທີ 20 ພຶດສະພາຜ່ານມາວ່າ ມີຜູ້ເສຍຊີວິດແລ້ວຢ່າງໜ້ອຍ 32 ລາຍ ໃນນັ້ນ ແມ່ນນັກໂທດ 29 ລາຍ ແລະ ຜູ້ຄຸມ 3 ລາຍ ຫຼັງຈາກທີ່ນັກໂທດກຸ່ມໄອເອສກໍ່ການຈະລາຈົນໃນເຮືອນຈຳ.
ອີງຕາມຂ້ໍມູນການຖະແຫຼງຂອງກະຊວງຍຸຕິທຳແຫ່ງທາຈິສຖານໃຫ້ຮູ້ວ່າ ເຫດຈະລາຈົນໄດ້ເກີດຂຶ້ນເມື່ອກາງເດິກຂອງຄືນວັນທີ 19 ພຶດສະພາ (ຕາມເວລາທ້ອງຖິ່ນ) ໃນເຮືອນຈຳຄວາມໝັ້ນຄົງສູງເມືອງວັກດັຕ ຊຶ່ງຢູ່ຫ່າງຈາກນະຄອນດູຊານເບ ນະຄອນຫຼວງຂອງຈິກິສຖານໄປທາງທິດຕາເວັນອອກປະມານ 10 ກີໂລແມັດ ຂະນະທີ່ນັກໂທດສະມາຊິກດາອິຊ (ກຸ່ມໄອເອສ) ໃຊ້ອາວຸດມີດແທງຜູ້ຄຸມເສຍຊີວິດ 3 ລາຍ ແລະ ນັກໂທດອີກ 5 ລາຍ.
ຫຼັງຈາກນັ້ນກຸ່ມນັກໂທດດາອິຊໄດ້ຈູດໄຟເຜົາພະແນກພະຍາບານຂອງເຮືອນຈຳ ແລະ ຈັບກຸມນັກໂທດອີກຫຼາຍຄົນເປັນຕົວປະກັນສຳລັບການຫຼົບໜີອອກນອກເຮືອນຈຳ ແຕ່ຖືກຂັດຂວາງໂດຍເຈົ້າໜ້າທີ່ຄວາມໝັ້ນຄົງຊຶ່ງເປັນກຳລັງເສີມເຂົ້າມາຄວບຄຸມສະຖາ ນະການ ທັງນີ້ ໜ່ວຍຄອມມັນໂດໄດ້ຍິງນັກໂທດກຸ່ມທີ່ກໍ່ເຫດເສຍຊີວິດ 24 ລາຍ ແລະ ຈັບກຸມ 35 ຄົນ ສ່ວນນັກໂທດທີ່ຖືກຈັບເປັນຕົວປະກັນແມ່ນປອດໄພ.
ເຮືອນຈຳແຫ່ງນີ້ມີນັກໂທດຖືກຄຸມຂັງຢູ່ປະມານ 1.500 ຄົນ ໂດຍເຈົ້າໜ້າທີ່ໄດ້ເປີດເຜີຍວ່າ ໜຶ່ງໃນກຸ່ມນັກໂທດທີ່ກໍ່ເຫດຄື ທ້າວ ເບຕຣູຊ ກຸລມາຣອດ ລູກຊາຍຂອງອະດີດນາຍທະ ຫານຍົດພັນເອກກອງທັບທາຈິກິສຖານທີ່ແປພັກເຂົ້າຮ່ວມກັບກຸ່ມໄອເສເມື່ອປີ 2014.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: dailynews