ອາເມຣິກາສືບຕໍ່ຊ່ວຍເຫຼືອປັບປຸງຊີວິດການເປັນຢູ່ຂອງຄົນພິການຢູ່ 2 ແຂວງຂອງ ສປປ ລາວ ຄື ແຂວງຊຽງຂວາງ ແລະ ສະຫວັນນະເຂດ.
ເມື່ອວັນທີ 16 ພຶດສະພາ 2019 ທີ່ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈເພື່ອຊ່ວຍເຫຼືອປັບປຸງຊີວິດການເປັນຢູ່ຂອງຄົນພິການໃນລາວ ພາຍໃຕ້ໂຄງການ “ໂອກາດ” ເພື່ອສະໜັບສະໜູນການພັດທະນາແບບມີສ່ວນຮ່ວມຂອງຄົນພິການ ຢູ່ ສປປ ລາວ ຊຶ່ງມີໄລຍະເວລາຈັດຕັ້ງປະຕິບັດໂຄງການແມ່ນ 5 ປີໃນ 2 ຄື ແຂວງຊຽງຂວາງ ແລະ ສະຫວັນນະເຂດ ໂດຍຜ່ານອົງ ການພັດທະນາສາກົນ ປະເທດສະຫະລັດອາເມຣິກາ (USAID) ມູນຄ່າ 15 ລ້ານໂດລາ.
ໂຄງການດັ່ງກ່າວຈະໄດ້ສຸມໃສ່ 3 ເປົ້າໝາຍຫຼັກຄື 1. ການປັບປຸງການເຂົ້າເຖິງການບໍລິການດ້ານສຸຂະພາບ 2. ການຟື້ນຟູການມີຄຸນນະພາບ ເພີ່ມໂອກາດການມີວຽກເຮັດງານທໍາໃຫ້ຄົນພິການ 3. ເສີມສ້າງຄວາມເຂັ້ມແຂງດ້ານວຽກງານສຸຂະພາບ ໂດຍຜ່ານການມີສ່ວນຮ່ວມຂອງພາກສ່ວນຕ່າງໆທີ່ກ່ຽວຂ້ອງ.
ຮ່ວມເຊັນບົດບັນທຶກໂດຍ ທ່ານ ຄໍາປິງ ແສງຕານນະລາດ ຫົວໜ້າກົມນະໂຍບາຍ ກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ນາງ ຊາຣ່າ ບຣູນາກີ ຫົວໜ້າອົງການອົງການ ເວີລດເອດຢູເຄຊັນ ສະຫະລັດອາເມຮິກາ ປະຈໍາລາວ ມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ໂດຍ: ສະຫະລັດ ວອນທິວົງໄຊ