ປະເທດຕີມໍ-ເລສເຕຮ່ວມມືກັບບໍລິສັດວິໄຈອົດສະຕຣາລີທີ່ຈະນຳໃຊ້ເຕັກໂນໂລຊີຣີໄຊເຄິລຂີ້ເຫຍື້ອພລາສຕິກແບບທີ່ບໍ່ເຄີຍມີປະເທດໃດເຮັດມາກ່ອນ.
ຕີມໍ-ເລສເຕ ຫຼື ມີຊື່ເດີມວ່າ ຕິມໍຕາເວັນອອກ ປະເທດນ້ອງໃໝ່ໃນອາຊີຕາເວັນອອກສຽງໃຕ້ ຊຶ່ງມີປະຊາກອນພຽງແຕ່ 1,3 ລ້ານຄົນ ແຕ່ວ່າປະເທດນີ້ຜະລິດຂີ້ເຫຍື້ອພລາສຕິກເຖິງ 70 ໂຕນຕໍ່ມື້ ທັງນີ້ ລັດຖະບານຕິມໍ-ເລສເຕໄດ້ລົງນາມບົດບັນທຶກຄວາມເຂົ້າໃຈ (MOU) ກັບບໍລິສັດວິໄຈ ມູຣາ ເຕັກໂນໂລຊີ ຂອງອົດສະຕຣາລີ ຊຶ່ງໄດ້ຮ່ວມກໍ່ຕັ້ງອົງກອນທີ່ບໍ່ສະແຫວງຫາຜົນປະໂຫຍດໃນຊື່ “ເຣສເປັກ” ເພື່ອສ້າງໂຮງງານຣີໄຊເຄິລຂີ້ເຫຍື້ອພລາສຕິກມູນຄ່າ 40 ລ້ານໂດລາ ໂດຍຈະເລີ່ມດຳເນີນການພາຍໃນທ້າຍປີ 2020.
ໂດຍໂຮງງານດັ່ງກ່າວຈະນຳພລາສຕິກທີ່ໃຊ້ແລ້ວທັງໝົດມາຣີໄຊເຄິລເປັນຜະລິດຕະພັນໃໝ່ ຊຶ່ງໝາຍຄວາມວ່າ ຕິມໍ-ເຣສເຕຈະກາຍເປັນປະເທດທຳອິດໃນໂລກທີ່ຈະບໍ່ມີຂີ້ເຫຍື້ອພລາສຕິກ ຂະນະທີ່ ທ່ານ ໂທມັສ ມາສເມເຍີຣ ຜູ້ຮ່ວມຄິດຄົ້ນເຕັກໂນໂລຊີຣີໄຊເຄິລດັ່ງກ່າວໄດ້ເປີດເຜີຍວ່າ ພລາສຕິກຖ້າມີການຖິ້ມທີ່ບໍ່ຖືກວິທີມັນຈະກາຍເປັນສິ່ງທີ່ໜ້າວິຕົກກັງວົນທີ່ສຸດ ກົງກັນຂ້າມຖ້າມີການກຳຈັດ ແລະ ຖິ້ມຖືກວິທີມັນກໍຈະກາຍເປັນສິ່ງທີ່ສາມາດນຳໃຊ້ໃຫ້ເກີດປະໂຫຍດໄດ້ຫຼາຍຢ່າງດ້ວຍການນຳໃຊ້ເຕັກໂນໂລຊີດ້ານເຄມີປ່ຽນແປງສະພາບຂີ້ເຫຍື້ອພລາສຕິກໃຫ້ເປັນຂອງແຫຼວ ແລະ ແກ໊ສຢ່າງໄວວາກ່ອນນຳໃຊ້ເຂົ້າສູ່ລະບົບເສດຖະກິດໝູນວຽນ (Circular Economy) ຊຶ່ງຫຼັກການດັ່ງກ່າວຍັງບໍ່ເຄີຍມີປະເທດໃດເຄີຍເຮັດມາກ່ອນ.
ຂະນະທີ່ຜູ້ຊ່ຽວຊານເລື່ອງຂີ້ເຫຍື້ອໄດ້ເປີດເຜີຍວ່າ ແຕ່ລະປີມີຂີ້ເຫຍື້ອພລາສຕິກຖືກຖິ້ມລົງທະເລທົ່ວໂລກຫຼາຍກວ່າ 8 ລ້ານໂຕນ ຊຶ່ງນອກຈາກຂີ້ເຫຍື້ອພລາສຕິກຈະສົ່ງຜົນຮ້າຍຕໍ່ສຸຂະພາບຂອງມະນຸດ ແລະ ສັດປ່າ-ສັດນ້ຳຢ່າງຮ້າຍແຮງແລ້ວ ມັນຍັງສ້າງຄວາມສູນເສຍຕໍ່ອຸດສາຫະກຳການທ່ອງທ່ຽວ ການປະມົງ ແລະ ການເດີນທະເລມູນຄ່າມະຫາສານເຖິງ 1.300 ລ້ານໂດລາຕໍ່ປີ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: ໄທຣັດ