ຫວຽດນາມຂຶ້ນຊື່ວ່າເປັນສະຫວັນຂອງບັນດານັກທ່ອງທ່ຽວທົ່ວໂລກທີ່ມີແຫຼ່ງທ່ອງທ່ຽວຫຼາກຫຼາຍ ລວມເຖິງພູມີປະເທດທີ່ສວຍງາມ ແລະ ເມື່ອປີ 2017 ອົງການການທ່ອງທ່ຽວໂລກແຫ່ງສະຫະປະຊາຊາດກໍໄດ້ປະກາດໃຫ້ຫວຽດນາມເປັນ 1 ໃນ 10 ຈຸດໝາຍປາຍທາງຂອງການທ່ອງທ່ຽວທີ່ຂະຫຍາຍຕົວໄວທີ່ສຸດໃນໂລກ.
ການຂະຫຍາຍຕົວແບບກ້າວກະໂດດນີ້ສ່ວນໜຶ່ງແມ່ນເປັນຍ້ອນນັກທ່ອງທ່ຽວຈາກ ສ.ເກົາຫຼີ ຊຶ່ງເດີນທາງເຂົ້າມາທ່ຽວຫວຽດນາມເພີ່ມຂຶ້ນ ພ້ອມນີ້ ສາຍການບິນຂອງ ສ.ເກົາຫຼີ ກໍໄດ້ເປີດເສັ້ນທາງບິນກົງຈາກ ສ.ເກົາຫຼີ ມາຍັງດານັງເພີ່ມຂຶ້ນ.
ເມືອງດານັງກາຍເປັນທີ່ຮູ້ຈັກຂອງນັກທ່ອງທ່ຽວ ສ.ເກົາຫຼີ ຫຼັງຈາກທີ່ມີລາຍການໂທລະພາບໄດ້ນຳສະເໜີສະຖານທີ່ທ່ອງທ່ຽວສຳຄັນໆ ລວມເຖິງການຣີວິວທິວທັດທີ່ສວຍງາມຂອງສະຖານທີ່ທ່ອງທ່ຽວຕ່າງໆຂອງຫວຽດນາມຫຼາຍແຫ່ງ ໂດຍສະເພາະແມ່ນສະພານສີທອງ (Golden Bridge) ຊຶ່ງຕັ້ງຢູ່ເທິງອົ້ງມືຍັກໃຫຍ່ເໜືອຍອດພູບານາຮິລທີ່ມີຄວາມສວຍງາມ ແລະ ແປກໃໝ່.
ຊຶ່ງເມື່ອປີຜ່ານມາ ຄະນະກຳມະການທ້ອງຖິ່ນຂອງເມືອງດານັງກໍໄດ້ຈັດກິດຈະກຳເພື່ອພັດທະນາການທ່ອງທ່ຽວ ບໍ່ວ່າຈະເປັນການປັບປຸງຄຸນນະພາບຂອງສິນຄ້າ ການບໍລິການ ການຂົນສົ່ງ ລວມເຖິງສິ່ງອຳນວຍຄວາມສະດວກຕ່າງໆ ນອກນີ້ ກໍໄດ້ມີການປະຊາສຳພັນແຫຼ່ງທ່ອງທ່ຽວຫຼາກຫຼາຍຮູບແບບ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday