ກະຊວງການຕ່າງປະເທດຮ່ວມກັບກົມເສດຖະກິດ-ສັງຄົມ ຂອງອົງການສະຫະປະຊາຊາດ (UN-DESA) ໄດ້ຈັດກອງປະຊຸມຝຶກອົບຮົມຍົກລະດັບຄວາມຮູ້ໃຫ້ແກ່ກອງເລຂາຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ແລະ ຄະນະຈຸດປະສານງານ ປພຍ ແຫ່ງຊາດ ເພື່ອສົ່ງເສີມໃຫ້ທຸກພາກສ່ວນໃນສັງຄົມມີສ່ວນຮ່ວມໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຢູ່ ສປປ ລາວ ໃຫ້ມີຜົນສຳເລັດສູງ ກອງປະຊຸມດັ່ງກ່າວໄດ້ຈັດຂື້ນເມື່ອວັນທີ 17 ພຶດສະພາ 2019 ທີ່ນະຄອນຫຼວງວຽງຈັນ ໂດຍມີນັກສຳມະນາຈາກພາຍໃນ ແລະ ຕ່າງປະເທດເຂົ້າຮວ່ມ.
ການຝຶກອົບຮົມຄັ້ງນີ້ຍັງເປັນການສົ່ງເສີມການປະສານງານເພື່ອການຈັດຕັ້ງປະຕິບັດວາລະປີ 2030 ຢູ່ ສປປ ລາວ ໂດຍສະເພາະແມ່ນເພື່ອຍົກລະດັບບັນດາວິຊາການຂອງກອງເລຂາ ປພຍ ກ່ຽວກັບການສ້າງແຜນງານ ນະໂຍບາຍ ແລະ ກິດຈະກໍາຕ່າງໆເພື່ອປັບປຸງການປະສານງານກັບບັນດາຈຸດປະສານງານ ປພຍ ຂອງແຕ່ລະຂະແໜງການໃຫ້ມີປະສິດຕິພາບ ທັງແນໃສ່ສ້າງຄວາມອາດສາມາດຂອງບັນດາຈຸດປະສານງານ ປພຍ ຂອງແຕ່ລະກະຊວງກ່ຽວກັບການຈັດຕັ້ງປະຕິບັດ ປພຍ ໂດຍສົ່ງເສີມການມີສ່ວນຮ່ວມຂອງທຸກພາກສ່ວນໃນສັງຄົມ ເພື່ອສາມາດບັນລຸໄດ້ແນວທາງການພັດທະນາທີ່ຍືນຍົງ ແລະ ການບໍ່ຖິ້ມໃຜໄວ້ຂ້າງຫຼັງ.
ທ່ານ ອານຸພາບ ວົງໜໍ່ແກ້ວ ຫົວໜ້າກົມອົງການຈັດຕັ້ງສາກົນ ແລະ ທັງເປັນຫົວໜ້າກອງເລຂາຄະນະຊີ້ນໍາລະດັບຊາດເພື່ອຈັດຕັ້ງປະຕິບັດ ປພຍ ກະຊວງການຕ່າງປະເທດ ໄດ້ເນັ້ນໜັກເຖິງຄວາມໝາຍຄວາມສໍາຄັນຂອງການມີສ່ວນຮ່ວມຂອງທຸກຂະແໜງການຂອງລັດ ນັບທັງພາກເອກະຊົນ ແລະ ທຸກຂະແໜງການທີ່ກ່ຽວຂ້ອງທັງສາຍຕັ້ງ ແລະ ສາຍຂວາງ ບົນພື້ນຖານການມີສ່ວນຮ່ວມຂອງທຸກພາກສ່ວນໃນສັງຄົມ ເພື່ອປະກອບສ່ວນເຂົ້າໃນການພັດທະນາຂອງປະເທດ ວຽກງານດັ່ງກ່າວນີ້ແມ່ນນອນຢູ່ໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ຄຽງຄູ່ກັບການພັດທະນາແບບຍືນຍົງກໍຍັງຕ້ອງການບັນລຸໄດ້ຄໍາຂວັນຂອງອົງການ ສປຊ ໃນການ “ບໍ່ປະຖິ້ມໃຜໄວ້ຂ້າງຫຼັງ”.
ດັ່ງນັ້ນ ການສ້າງຄວາມອາດສາມາດຂອງກອງເລຂາ ປພຍ ແລະ ບັນດາຄະນະຈຸດປະສານງານ ປພຍ ແຫ່ງຊາດ ຈິ່ງເປັນພື້ນຖານອັນສໍາຄັນໃນການດໍາເນີນການຈັດຕັ້ງປະຕິບັດ ປພຍ ແຕ່ນີ້ຮອດປີ 2030.
ທ່ານ ນາງ ຊາຣາ ເຊັນເກນເນສ ກໍໄດ້ກ່າວວ່າ ການສົ່ງເສີມການມີສ່ວນຮ່ວມຂອງທຸກພາກສ່ວນໃນສັງຄົມຈະສາມາດຊ່ວຍກຸ່ມຜູ້ດ້ອຍໂອກາດໃນສົງຄົມ ແລະ ພວກເຮົາເອງສາມາດຊ່ວຍໃຫ້ພວກເຂົາສ້າງຄວາມອາດສາມາດ ແລະ ປັບປຸງການດໍາລົງຊີວິດຂອງພວກເຂົາໄດ້ ນອກນັ້ນ ກອງປະຊຸມຍັງໄດ້ມີການສົນທະນາ ແລະ ປະກອບຄໍາເຫັນຢ່າງຟົດຟື້ນກ່ຽວກັບບົດບາດຂອງຂະແໜງການໃນການສ້າງກິດຈະກໍາ ແລະ ການວາງແຜນເພື່ອຊຸກຍູ້-ສົ່ງເສີມໃຫ້ມີການມີສ່ວນຮ່ວມຂອງທຸກຄົນໃນສັງຄົມ.
ໂດຍ: ສະຫະລັດ ວອນທິວົງໄຊ