ນະຄອນຫຼວງເມັກຊິໂກ ຊິຕີ ເລັ່ງຫາວິທີແກ້ໄຂວິກິດໝອກຄວັນພິດຢ່າງຮີບດ່ວນ ທັງນີ້ ໄດ້ມີຄຳສັ່ງປິດໂຮງຮຽນຫຼາຍແຫ່ງ ຈຳກັດການໃຊ້ລົດ ລວມເຖິງສັ່ງໂຈະໂຄງການກໍ່ສ້າງ ແລະ ອື່ນໆ.

ເທສະບານນະຄອນເມັກຊິໂກ ຊິຕີ ຊຶ່ງມີປະຊາກອນອາໄສຢູ່ຫຼາຍກວ່າ 20 ລ້ານຄົນ ໄດ້ອອກຖະແຫຼງການສັ່ງປິດໂຮງຮຽນທຸກແຫ່ງ ໃນເຂດພື້ນທີ່ສ່ຽງໄພເປັນເວລາ 2 ວັນ ພາຍຫຼັງທີ່ໄດ້ອອກປະກາດເຕືອນໄພສະຖານະການສຸກເສີນດ້ານສິ່ງແວດລ້ອມ ພ້ອມທັງຂໍຄວາມຮ່ວມມືໃຫ້ປະຊາຊົນໂດຍສະເພາະເດັກ ແມ່ຍິງຖືພາ ແລະ ຜູ້ອາຍຸສູງ ຈົ່ງຫຼີກເວັ້ນການເຮັດກິດຈະກຳກາງແຈ້ງ ແລະ ເພີ່ມສະຕິໃນການສວມໃສ່ໜ້າກາກອະນາໄມທີ່ໄດ້ມາດຕະຖານເພື່ອປ້ອງກັນຝຸ່ນລະອອງ.

ພ້ອມນີ້ ທາງການກໍໄດ້ອອກມາດຕະການຄວບຄຸມການໃຊ້ພາຫະນະເກົ່າ ລວມເຖິງສັ່ງໂຈະໂຄງການກໍ່ສ້າງທີ່ນຳໃຊ້ພື້ນທີ່ກວ້າງ ທັງໄດ້ອອກຄຳສັ່ງໃຫ້ບັນດາໂຮງງານອຸດສາຫະກຳຫຼາຍແຫ່ງຮ່ວມມືຫາວິທີຫຼຸດຜ່ອນການປ່ອຍມົນລະພິດໃຫ້ໄດ້ໃນລະດັບ 30-40%.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: AP,REUTERS