ຖືເປັນກະແສທີ່ພວມໄດ້ຮັບຄວາມສົນໃຈຈາກຊາວໂຊຊຽວ ເມື່ອສຳນັກຂ່າວຊື່ດັງຂອງຈີນໄດ້ລາຍງານຂ່າວກ່ຽວກັບບໍລິສັດແຫ່ງໜຶ່ງ ທີ່ມີຊື່ວ່າ “ເໜົ່າໄປ໋ຈິນ” ຊຶ່ງໄດ້ປະກາດຮັບສະໝັກພະນັກງານໃຫ້ມານອນຫຼັບໂດຍບໍ່ຕ້ອງເຮັດຫຍັງເລີຍ ພຽງແຕ່ກຽມເສື້ອຜ້າ ແລະ ຮ່າງກາຍໃຫ້ພ້ອມເທົ່ານັ້ນ.
ໂດຍບໍລິສັດຈະຈ່າຍເງິນເດືອນໃຫ້ຄົນທີ່ໄດ້ເຂົ້າມາເຮັດວຽກໃນຕຳແໜ່ງດັ່ງກ່າວຫຼາຍກວ່າ 10 ລ້ານກີບຕໍ່ເດືອນ ແລະ ຈະໄດ້ເຊັນສັນຍາເປັນເວລາ 1 ປີ ຊຶ່ງພາຍຫຼັງທີ່ທາງບໍລິສັດໄດ້ປະກາດຮັບສະໝັກຜ່ານທາງເວັບໄຊກໍມີຜູ້ຄົນຈຳນວນຫຼາຍໃຫ້ຄວາມສົນໃຈ ແຕ່ວ່າກ່ອນທີ່ຈະຖືກຮັບເຂົ້າມາເປັນພະນັກງານໄດ້ນັ້ນກໍຕ້ອງໄດ້ຜ່ານການຄັດເລືອກ ແລະ ກວດສອບປະຫວັດ ລວມເຖິງຄຸນສົມບັດກ່ອນ ໂດຍຜູ້ທີ່ຈະໄດ້ຮັບຄັດເລືອກຈະຕ້ອງເປັນຄົນທີ່ມັກໃນການນອນແທ້ໆ ຕ້ອງມີສຸຂະພາບແຂງແຮງ ບໍ່ມີພະຍາດປະຈຳຕົວ ແລະ ທີ່ສຳຄັນທີ່ສຸດແມ່ນຕ້ອງມີສະຖານະໂສດເທົ່ານັ້ນ.
ຊຶ່ງຈຸດປະສົງຂອງບໍລິສັດກໍເພື່ອສຶກສາພຶດຕິກຳການນອນຂອງແຕ່ລະຄົນ ເພື່ອນຳໄປສູ່ການວິເຄາະ ແລະ ວິໄຈກ່ຽວກັບອາການນອນບໍ່ຫຼັບ ທັງນີ້ ກໍເພື່ອນຳໃຊ້ເປັນຂໍ້ມູນສະຖິຕິໃນການຕໍ່ຍອດກ່ຽວກັບການປິ່ນປົວອາການນອນບໍ່ຫຼັບໃນອະນາຄົດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: postjung.com