ສະມາຄົມນັກທຸລະກິດໜຸ່ມ ແຫ່ງຊາດລາວ ໄດ້ພົບປະແລກ-ປ່ຽນບົດຮຽນກັບສະມາຄົມ ນັກທຸລະກິດຫວຽດນາມ ຮ່ວມມື ແລະ ລົງທຶນ ປະຈຳລາວ ໃນວັນທີ 14 ພຶດສະພາ 2019 ຢູ່ນະຄອນ ຫລວງວຽງຈັນ, ເພື່ອຊອກຫາຊ່ອງທາງສົ່ງເສີມການຮ່ວມມື ໃນການດຳເນີນທຸລະກິດໃຫ້ສະມາຊິກຂອງ ສອງ ສະມາຄົມ ໃຫ້ສາມາດຈັບຄູ່ຮ່ວມມືທາງທຸລະກິດຫລາຍຂຶ້ນ.
ໃນການພົບປະຄັ້ງນີ້, ນັກທຸລະກິດຂອງສອງສະມາຄົມດັ່ງກ່າວ ໄດ້ພ້ອມກັນປຶກສາຫາລື ຊອກຫາທິດທາງການຮ່ວມມືໃນດ້ານຕ່າງໆ ເພື່ອເຮັດໃຫ້ການຮ່ວມມື-ການລົງທຶນ ລະຫວ່າງສອງຝ່າຍ ມີປະສິດທິຜົນສູງຂຶ້ນ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ. ພ້ອມດຽວກັນນີ້, ກໍໄດ້ມີພິທີລົງນາມສັນຍາການຮ່ວມມື ທາງດ້ານທຸລະກິດ ລະຫວ່າງ ສະມາຄົມນັກທຸລະກິດໜຸ່ມ ແຫ່ງຊາດລາວ ແລະ ນັກທຸລະກິດຫວຽດນາມ ຮ່ວມມື ແລະ ລົງທຶນ ປະຈຳລາວ ເພື່ອສ້າງຄວາມເຂັ້ມແຂງຢ່າງຮອບດ້ານ ໃນການບໍລິການທຸລະກິດຄົບວົງຈອນ, ການຮ່ວມມື, ການຈັບຄູ່ຄ້າທຸລະກິດ ແລະ ການແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ.
ໃນໂອກາດນີ້, ທ່ານ ວິໄລສານ ພົມມີໄຊ ຮອງປະທານສະມາຄົມນັກທຸລະກິດໜຸ່ມແຫ່ງຊາດລາວ ໄດ້ຍົກໃຫ້ເຫັນເຖິງພາລະບົດບາດ ຂອງສະມາຄົມນັກທຸລະກິດໜຸ່ມແຫ່ງຊາດລາວ, ເຊິ່ງເປັນບ່ອນເຕົ້າໂຮມຄວາມສາມັກຄີຂອງບັນດານັກທຸລະກິດ, ຊາວຄ້າຂາຍ, ຜູ້ປະກອບການ ເພື່ອຊຸກຍູ້ສົ່ງເສີມໃຫ້ມີຄວາມເຂັ້ມແຂງ, ສ້າງໃຫ້ຊາວໜຸ່ມກາຍເປັນຜູ້ປະກອບການໃໝ່, ເປັນກຳລັງແຮງປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມ ທັງເປັນການສ້າງນັກທຸລະກິດໜຸ່ມ ແລະ ປຸກລະດົມຜູ້ປະກອບການ ລຸ້ນໃໝ່ ໃນຂອບເຂດທົ່ວປະເທດ ເຂົ້າເປັນສະມາຊິກ ສະມາຄົມທຸລະກິດແຫ່ງຊາດລາວ ແລະ ອື່ນໆ.
ຂຽນໂດຍ: ບຸນມີ ບຸນມີໄຊ