ທະນາຄານໂລກ ໄດ້ໃຫ້ການສະໜັບສະໜູນທຶນຕື່ມອີກ ຈຳນວນ 52 ລ້ານໂດລາສະ ຫະລັດ ເພື່ອຈັດຕັ້ງປະຕິບັດ 2 ໂຄງການໃໝ່ ຄື: ໂຄງການຫລຸດຜ່ອນຄວາມທຸກຍາກ ແລະ ການຂາດສານອາຫານໃນຊົນນະບົດ ຂອງຂະແໜງປົກປ້ອງສັງຄົມ ມູນຄ່າ 27 ລ້ານ ໂດລາສະຫະລັດ; ໂຄງການຂະຫຍາຍນໍ້າປະປາ, ສຸຂະພິບານ ແລະ ອະນາໄມລວມ ມູນຄ່າ 25 ລ້ານໂດລາສະຫະລັດ ໂດຍສະເພາະຢູ່ແຂວງຊຽງຂວາງ, ຫົວພັນ, ຜົ້ງສາລີ ແລະ ແຂວງອຸດົມໄຊ.
ທ້າຍອາທິດຜ່ານມາ ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ ໄດ້ຮ່ວມລົງນາມໃນສັນຍາ ກັບ ທ່ານ ນິໂກລາ ປອນຕາຣາ ຫົວໜ້າຫ້ອງການທະນາຄານໂລກ ປະຈຳ ສປປ ລາວ, ມີຕາງໜ້າຈາກສອງພາກສ່ວນທີ່ກ່ຽວຂ້ອງເຂົ້າຮ່ວມ.
ການປະຕິບັດສອງໂຄງການໃໝ່ນີ້, ເປັນການວາງລະບົບການປົກປ້ອງທາງສັງຄົມແຫ່ງຊາດ ແລະ ສະໜັບສະໜູນການໂອນເງິນແບບມີເງື່ອນໄຂ ເພື່ອການຫັນປ່ຽນພຶດຕິກຳຂອງກຸ່ມຄົວເຮືອນເປົ້າໝາຍ, ປັບປຸງໂພຊະນາການໃຫ້ດີຂຶ້ນ ໂດຍສະເພາະພາຍໃນ 3 ປີທຳອິດ. ສ່ວນໂຄງການຂະ ຫຍາຍນໍ້າປະປາ, ສຸຂະພິບານ ແລະ ອະນາໄມ ຈະເປັນການເຂົ້າເຖິງນໍ້າ, ສຸຂະພິບານ ແລະ ອະນາ ໄມທີ່ດີຂຶ້ນ ເນື່ອງຈາກ 4 ແຂວງດັ່ງກ່າວ, ໄດ້ຮັບຜົນກະທົບຈາກການຂາດສານອາຫານຊໍ້າເຮື້ອ(ເຕັ້ຍ) ໃນລະດັບສູງກວ່າ 40%, ການຂາດສານອາຫານຊໍ້າເຮື້ອໃນໄວເດັກ ສົ່ງຜົນໃຫ້ສຸຂະພາບອ່ອນແອ, ເຮັດໃຫ້ເດັກນ້ອຍພັດທະນາການຊ້າ, ຜົນຕໍ່ການຮຽນຕໍ່າ ແລະ ໃນທີ່ສຸດເຮັດໃຫ້ໂອກາດໃນການຖືກຈ້າງງານລົດລົງ. ສະນັ້ນ, ຈຶ່ງເຮັດໃຫ້ຊຸມຊົນບໍ່ສາມາດຫລຸດພົ້ນອອກຈາກຄວາມທຸກຍາກ.
ທ່ານ ນິໂກລາ ປອນຕາຣາ ຫົວໜ້າຫ້ອງການ ທະນາຄານໂລກປະຈຳລາວ ກ່າວວ່າ: ເດັກນ້ອຍທີ່ເກີດໃນ ສປປ ລາວ ສະເລ່ຍຈະມີປະສິດທິຜົນ ພຽງແຕ່ 45% ຖ້າທຽບໃສ່ປະສິດທິຜົນອັນເຕັມສ່ວນ ໃນກໍລະນີໄດ້ຮັບການສຶກສາ ແລະ ບໍລິການສຸຂະພາບເຕັມທີ່. ການລົງທຶນເຂົ້າໃນການປັບປຸງໂພຊະນາການ ໝາຍເຖິງການສ້າງທຶນມະນຸດຂອງປະເທດ ເຊິ່ງຈະຊ່ວຍໃນການເຕີບໃຫຍ່ທາງດ້ານເສດຖະກິດຂອງປະເທດໃນອະນາຄົດ.
ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ໄດ້ສະແດງຄວາມຂອບໃຈເປັນຢ່າງຍິ່ງ ຕໍ່ການການສະໜັບສະໜູນຈາກທະນາຄານໂລກ ໂດຍສະເພາະໃນຂົງເຂດການພັດທະນາຊົນນະບົດ ແລະ ຊັບພະຍາກອນມະນຸດ ເຊິ່ງຈະປະກອບສ່ວນສຳຄັນເຮັດໃຫ້ການປັບປຸງສະພາບການດຳລົງຊີວິດຂອງປະຊາຊົນດີຂຶ້ນເທື່ອລະກ້າວ. ການຫລຸດຜ່ອນຄວາມທຸກຍາກ ດ້ວຍການຂະຫຍາຍການເຂົ້າເຖິງນໍ້າສະອາດ, ສຸຂາພິບານ ແລະ ສຸຂະນາໄມລວມທັງການສ້າງຕາໜ່າງປົກປ້ອງສັງຄົມ ຜ່ານວຽກງານໂພຊະນາການທາງອ້ອມສຳລັບຄົວເຮືອນທີ່ທຸກຍາກ ແລະ ດ້ອຍໂອກາດຂ້າງເທິງ ຈະໄດ້ຮັບການຈັດຕັ້ງປະຕິບັດ ຢ່າງມີປະສິດທິຜົນ ໃນ 4 ແຂວງເປົ້າໝາຍ ເພື່ອໃຫ້ຊຸມຊົນໄດ້ຫລຸດພົ້ນຈາກຄວາມທຸກຍາກ ເທື່ອລະ ກ້າວ.