ຢູ່ໃນກະແສບໍ່ເຄີຍຂາດສຳລັບນັກຮ້ອງສາວສຽງຊົງພະລັງນັ້ນກໍຄື ຣີຮັນນາ ຊຶ່ງຫຼ້າສຸດນາງກໍຈັບມືກັບ LVMH ກຽມອອກແຟເຊິນ ພາຍໃຕ້ຊື່ Fenty.
LVMH ແມ່ນເປັນບໍລິສັດແມ່ຂອງຫ້ອງເສື້ອຊື່ດັງຫຼາຍຍີ່ຫໍ້ ບໍ່ວ່າຈະເປັນ ຫຼຸຍ ວິຕຕອງ ຄຣິດຕຽນ ດີອໍຣ ແລະ ເຟນດິ ສຳລັບແບຣນ Fenty ຂອງຣີຮັນນາ ແມ່ນຈະຄວບຄຸມທັງເສື້ອຜ້າ ເກີບ ກະເປົ໋າ ແລະ ເຄື່ອງປະດັບຕ່າງໆ ໂດຍຈະມີຖານການຜະລິດຢູ່ທີ່ນະຄອນຫຼວງປາຣີ ປະເທດຝຣັ່ງ ທັງນີ້ ແບຣນໃໝ່ໃນຊື່ Fenty ຈະອອກມາຕີຕະຫຼາດໃນລະຫວ່າງກາງປີ 2019 ນີ້.
ຣີຮັນນາ ຖືເປັນແມ່ຍິງຄົນທຳອິດທີ່ໄດ້ເຂົ້າມາຮ່ວມມືສ້າງແບຣນໃໝ່ກັບ LVMH ແລະ ຍັງເປັນແມ່ຍິງຜິວສີຄົນທຳອິດທີ່ກ້າວເຂົ້າມາມີແບຣນແຟເຊິນຂອງຕົນເອງພາຍໃຕ້ຫຼັງຄາຂອງ LVMH.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: teenee.com