Birgtte Kallestad ສາວໄວ 24 ປີຊາວນ໋ອກແວເສຍຊີວິດຈາກເຊື້ອພະຍາດໝາວໍ້ ເຫດການແມ່ນເກີດພາຍຫຼັງທີ່ນາງຖືກໝາຈອນຈັດທີ່ນາງຮັບມາລ້ຽງກັດຢູ່ປະເທດຟີລິບປິນຂະນະທີ່ນາງເດີນທາງໄປທ່ອງທ່ຽວ ຊຶ່ງຖືເປັນຄັ້ງທຳອິດໃນຮອບ 200 ປີຂອງປະເທດນ໋ອກແວທີ່ເກີດເຫດການດັ່ງກ່າວ.
ສຳນັກຂ່າວຕ່າງປະເທດໄດ້ລາຍງານເມື່ອວັນທີ 11 ພຶດສະພາຜ່ານມາວ່າ ຍິງສາວລາຍນີ້ໄດ້ເດີນທາງໄປທ່ອງທ່ຽວປະເທດຟີລິບປິນ ເມືອເດືອນກຸມພາຜ່ານມາ ຊຶ່ງໃນລະຫວ່າງຢູ່ທີ່ນັ້ນນາງກໍໄດ້ພົບກັບໝາຈອນຈັດ ຈິ່ງເກີດຄວາມອີດູຕົນ ແລ້ວນຳກັບມາບ່ອນພັກ ແລະ ໃນເວລາຕໍ່ມານາງກໍຖືກໝາໂຕດັ່ງກ່າວກັດ ແລະ ເກີດເປັນບາດແຜເລັກນ້ອຍ ແຕ່ນາງກໍບໍ່ໄດ້ໃສ່ໃຈ ຫຼື ຄິດຈະໄປກວດຮ່າງກາຍຢູ່ໂຮງໝໍເລີຍ.
ຊຶ່ງພາຍຫຼັງທີ່ນາງເດີນທາງກັບມານ໋ອກແວ ນາງກໍເກີດອາກາດເຈັບປ່ວຍ ແລະ ໄດ້ເຂົ້າໄປປິ່ນປົວຢູ່ໂຮງໝໍແຫ່ງໜຶ່ງ (ຫ້ອງສຸກ ເສີນ) ສຸດທ້າຍນາງກໍເສຍຊີວິດໃນເວລາຕໍ່ມາ ໂດຍແພດໄດ້ບົ່ງມະຕິວ່າ ສາເຫດຂອງການເສຍຊີວິດແມ່ນເກີດມາຈາກພິດໝາວໍ້ນັ້ນເອງ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: BBC