ອ່າວຮາລອງເບ ຕັ້ງຢູ່ແຂວງກວ່າງນິງ ຊຶ່ງຖືເປັນອີກໜຶ່ງແຫຼ່ງທ່ອງທ່ຽວທີ່ສຳຄັນຂອງຫວຽດນາມ ໃນນັ້ນ ມີເຮືອບໍລິການສຳລັບນັກທ່ອງທ່ຽວຫຼາຍກວ່າ 500 ລຳຕໍ່ວັນ ລວມເຖິງສະໜາມບິນເປີດໃໝ່ທີ່ມີຄວາມທັນສະໄໝ ແລະ ໄດ້ມາດຕະຖານສາກົນ.
ອ່າວຮາລອງເບ ໜຶ່ງໃນມໍລະດົກໂລກທີ່ເປັນອີກໜຶ່ງຄວາມພາກພູມໃຈຂອງຊາວຫວຽດນາມ ຊຶ່ງທີ່ຜ່ານມານັກທ່ອງທ່ຽວທັງພາຍໃນ ແລະ ຕ່າງປະເທດທີ່ເດີນທາງມາທ່ອງທ່ຽວສະຖານທີ່ແຫ່ງນີ້ລ້ວນແລ້ວແຕ່ເດີນທາງດ້ວຍເຮືອ ຫຼ້າສຸດ ນັບແຕ່ວັນທີ 10 ພຶດສະພາ 2019 ເປັນຕົ້ນໄປ ບັນດານັກທ່ອງທ່ຽວຈະມີອີກໜຶ່ງທາງເລືອກໃນການເດີນທາງເພື່ອຊົມວິວທິວທັດຂອງອ່າວແຫ່ງນີ້ ນັ້ນກໍຄື ບໍລິການເຮລິຄ໋ອບແຕ ຊຶ່ງຄິດຄ່າບໍລິການ 125 ໂດລາຕໍ່ຄົນໃນກຳນົດເວລາຖ້ຽວລະ 12 ນາທີ.
ສຳລັບເຮລິຄ໋ອບແຕທີ່ນຳມາໃຫ້ບໍລິການນັກທ່ອງທ່ຽວປັດຈຸບັນມີ 2 ລຳ ມີ 5 ບ່ອນນັ່ງ ໂດຍຈະບິນຂຶ້ນສູງຈາກພື້ນດິນປະມານ 300 ແມັດ ຂະນະທີ່ ທ່ານ ເດວິດ ເຊລ ຜຸູ້ອຳນວຍການຝ່າຍການຕະຫຼາດພູມີພາກອາຊີ-ແປຊິຟິກຂອງບໍລິສັດ ເບລ ຜູ້ຜະລິດເຮລິຄ໋ອບແຕລາຍໃຫຍ່ກ່າວວ່າ ຈຸດປະສົງຂອງການເປີດໃຫ້ບໍລິການດັ່ງກ່າວແມ່ນມີເປົ້າໝາຍດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມ ສະຖານທີ່ແຫ່ງນີ້ເພີ່ມຫຼາຍຂຶ້ນ ໂດຍສະເພາະກໍແມ່ນນັກທ່ອງທ່ຽວຈາກ ສປ ຈີນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP