ສານສູງສຸດແຫ່ງມະຫານະຄອນນິວຢອກ ສະຫະລັດອາເມຣິກາໄດ້ພິພາກສາຕັດສິນໃຫ້ຍິງສາວຊາວເຢຍລະມັນທີ່ແອບອ້າງວ່າຕົນເອງເປັນທາຍາດຂອງມະຫາເສດຖີ ຮັບໂທດສູງສຸດເຖິງ 12 ປີ.
ສຳນັກຂ່າວຕ່າງປະເທດໄດ້ລາຍງານເມື່ອວັນທີ 9 ພຶດສະພາຜ່ານມາວ່າ ສານຂອງມະຫານະຄອນນິວຢອກໄດ້ຕັດສິນລົງໂທດ ນາງ ສາວ ແອນນາ ໂຊໂຣກິນ ອາຍຸ 28 ປີ ສັນຊາດເຢຍລະມັນ ແລະ ມີເຊື້ອສາຍຣັດເຊຍ ຊຶ່ງນາງເປັນທີ່ຮູ້ຈັກຢ່າງກວ້າງຂວາງໃນແວດ ວົງສັງຄົມໄຮໂຊໃນນິວຢອກ ທັງນີ້ ແອນນາ ໄດ້ຖືກຕັດສິນຮັບໂທດຈຳຄຸກລະຫວ່າງ 4-12 ປີຈາກຄວາມຜິດຂໍ້ຫາສໍ້ໂກງເຖິງ 8 ຂໍ້ຫາ ລວມເຖິງຂໍ້ຫາພະຍາຍາມຫຼອກລວງຄົນອື່ນເພື່ອໃຫ້ໄດ້ມາຊຶ່ງຊັບສິນຂອງເຂົາເຈົ້າ.
ນອກນີ້ ກໍມີອີກຫຼາຍຄະດີ ໂດຍສະເພາະຄະດີທີ່ນາງປອມແປງເອກະສານເພື່ອຂໍສິນເຊື່ອຈາກທະນາຄານແຫ່ງໜຶ່ງໃນວົງເງິນ 200.000 ໂດລາ ໂດຍມີຂໍ້ອ້າງວ່າຈະນຳໄປໃຊ້ເປັນທຶນສຳລັບຈັດຕັ້ງອົງກອນການກຸສົນ ແຕ່ຄວາມຈິງແລ້ວນາງໄດ້ນຳເອົາເງິນ ຈຳນວນດ່ັ່ງກ່າວໄປໃຊ້ຈ່າຍແບບຟຸມເຟືອຍໃນສັງຄົມຊັ້ນສູງຈອມປອມຂອງນາງ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP