ລັດຖະບານປະເທດເນເທີແລນປະກາດຍຸຕິການປະຊາສຳພັນກ່ຽວກັບການທ່ອງທ່ຽວພາຍໃນປະເທດ ເນື່ອງຈາກວິຕົກກັງວົນກ່ຽວກັບຈຳນວນນັກທ່ອງທ່ຽວທີ່ມີຈຳນວນຫຼາຍເກີນໄປ.
ສຳນັກຂ່າວຕ່າງປະເທດລາຍງານເມື່ອວັນທີ 8 ພຶດສະພາຜ່ານມາ ໂດຍຄະນະກົມການທ່ອງທ່ຽວຂອງເນເທີແລນ (NBTC) ໄດ້ຕັດສິນໃຈຍຸຕິການປະຊາສຳພັນດ້ານການທ່ອງທ່ຽວ ທັງນີ້ ກໍເພື່ອຄວບຄຸມຈຳນວນນັກທ່ອງທ່ຽວໃຫ້ເໝາະສົມ ແລະ ເປັນປະໂຫຍດກັບທັງສອງຝ່າຍ ນອກນີ້ ຍັງໄດ້ຄາດຄະເນວ່າ ຈຳນວນນັກທ່ອງທ່ຽວທີ່ເດີນທາງເຂົ້າມາປະເທດຈະເພີ່ມຈຳນວນຈາກ 19 ລ້ານຄົນ ຕໍ່ປີເພີ່ມຂຶ້ນເປັນ 29 ລ້ານຄົນໃນທົດສະວັດໜ້າ.
ຄະນະກົມການທ່ອງທ່ຽວໄດ້ລະບຸຕື່ມວ່າ ຈຳນວນນັກທ່ອງທ່ຽວທີ່ເພີ່ມຂຶ້ນໄດ້ນຳຄວາມແອອັດໄປສູ່ພື້ນທີ່ຕ່າງໆເຊັ່ນ ຄອງທົ່ງດອກທິວລິບ ຫຼື ສວນກັງຫັນລົມ ຊຶ່ງຖືເປັນຈຸດທ່ອງທ່ຽວທີ່ມີສະເໜ ແລະສາມາດດຶງດູດນັກທ່ອງທ່ຽວໄດ້ເປັນຢ່າງດີ ຂະນະທີ່ເທສະການ ອີສເຕີຣເມື່ອປີຜ່ານມາມີນັກທ່ອງທ່ຽວເດີນທາງເຂົ້າມາເນເທີແລນຫຼາຍກວ່າ 150.000 ຄົນ ໃນນັ້ນ ມີການໃຊ້ຈ່າຍສູງເຖິງ 800 ລ້ານເອີໂຣພາຍໃນວັນພັກລາຊະການພຽງໜຶ່ງອາທິດເທົ່ານັ້ນ.
ຂະນະທີ່ນັກທ່ອງທ່ຽວທີ່ເດີນທາງມາຍັງນະຄອນຫຼວງອັມສະເຕີຣດັມມີຈຳນວນເຖິງ 18 ລ້ານຄົນເມື່ອປີ 2016 ຊຶ່ງຖືເປັນຕົວເລກທີ່ມີອັດຕາສູງແບບກ້າວກະໂດດຫາກທຽບປີ 2005 ຊຶ່ງມີຕົວເລກນັກທ່ອງທ່ຽວຢູ່ທີ່ 11 ລ້ານຄົນ ດັ່ງນັ້ນ ຄະນະກົມການທ່ອງ ທ່ຽວຂອງເນທີແລນຈິ່ງມຸ່ງເນັ້ນທີ່ຈະກະຈາຍນັກທ່ອງທ່ຽວໄປຍັງເຂດອື່ນ ໂດຍສະເພາະໃນສ່ວນທີ່ຍັງບໍ່ທັນໄດ້ຮັບຄວາມນິຍົມ ຊຶ່ງເມື່ອປີ 2018 ຜ່ານມາກໍໄດ້ມີການປະຊາສຳພັນທີ່ເອີ້ນວ່າ HollandCity ເພື່ອສະໜັບສະໜູນການທ່ອງທ່ຽວໃຫ້ກະຈາຍເປັນວົງກວ້າງໃນທຸກລະດູການ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: NBTC