ຂ້າພະເຈົ້າໄດ້ຂຶ້ນຄອງລາດຖືກຕ້ອງຕາມລັດຖະທໍາມະນູນແຫ່ງຍີ່ປຸ່ນ ແລະ ມາດຕະການພິເສດຂອງກົດໝາຍວ່າດ້ວຍກົດລະບຽບແຫ່ງສໍານັກພະລາດຊະວັງ ເມື່ອໃດທີ່ຂ້າພະເຈົ້າຄິດເຖິງໜ້າທີ່ຮັບຜິດຊອບອັນສໍາຄັນທີ່ຂ້າພະເຈົ້າໄດ້ຮັບ ຂ້າພະເຈົ້າກໍຈະເຕັມໄປດ້ວຍຄວາມຮູ້ສຶກອັນມຸ່ງໝັ້ນ ແລະ ຕັ້ງໃຈ, ກ່າວໂດຍ ມົງກຸດລາຊະກຸມານ ນາຣູຮິໂຕະ ຈັກກະພັດອົງໃໝ່ແຫ່ງ ຣາຊະອານາຈັກຍີ່ປຸ່ນ.

ເມື່ອຄັ້ງອະດີດສົມເດັດພະເຈົ້າຈັກກະພັດ ຊຶ່ງນັບຕັ້ງແຕ່ຂຶ້ນຄອງລາດເປັນຕົ້ນມາພະອົງໄດ້ຊົງປະຕິບັດພະລາດຊະກິດຂອງຕົນຢ່າງເຕັມຄວາມສາມາດເປັນເວລາຫຼາຍກວ່າ 30 ປີ ຂະນະດຽວກັນ ພະອົງກໍຊົງພາວະນາຢ່າງເຂັ້ມແຂງໃຫ້ໂລກມີສັນຕິພາບ ແລະ ປະຊາຊົນມີຄວາມສຸກ ພ້ອມທັງແບ່ງປັນຄວາມສຸກ ແລະ ແບ່ງເບົາຄວາມທຸກໃຫ້ແກ່ປະຊາຊົນທຸກຖ້ວນໜ້າ  ພະອົງໄດ້ຊົງສະແດງອອກເຖິງຄວາມເມດຕາກາລຸນາອັນສູງສົ່ງຜ່ານການປະຕິບັດພະລາດຊະກິດຂອງພະອົງ ຂ້າພະເຈົ້າຈຶ່ງຢາກສະແດງຄວາມເຄົາລົບນັບຖື ແລະ ຮູ້ບຸນຄຸນຢ່າງຈິງໃຈມາຍັງອະດີດສົມເດັດພະເຈົ້າຈັກກະພັດ ຜູ້ເປັນດັ່ງສັນຍາລັກຂອງລັດ ແລະ ສູນລວມຈິດໃຈຂອງປະຊາຊົນຊາວຍີ່ປຸ່ນ.

ເນື່ອງໃນໂອກາດຂຶ້ນຄອງລາດ ຂ້າພະເຈົ້າຂໍສາບານວ່າຈະລະນຶກໄວ້ໃນໃຈຢ່າງເລິກ ແລະ ພ້ອມທີ່ຈະນຳສະເໝີເຖິງແນວທາງປະຕິບັດພະລາດຊະກິດຂອງອະດີດສົມເດັດພະເຈົ້າຈັກກະພັດ ລວມທັງບາດກ້າວທີ່ບັນດາອະດີດພະເຈົ້າຈັກກະພັດອົງອື່ນໆທີ່ໄດ້ຊົງຝາກໄວ້ ແລະ ຈະອຸທິດຕົນຢ່າງຫ້າວຫັນເພື່ອພັດທະນາຕົນເອງຂຶ້ນໄປເລື້ອຍໆ.

ດັ່ງນັ້ນ ຂ້າພະເຈົ້າຂໍສາບານອີກວ່າ ຈະປະຕິບັດຕາມລັດຖະທໍາມະນູນ ແລະ ບັນລຸໜ້າທີ່ຮັບຜິດຊອບຂອງຕົນໃນຖານະເປັນສັນຍາລັກຂອງລັດ ແລະ ສູນລວມຈິດໃຈຂອງປະຊາຊົນຍີ່ປຸ່ນທົ່ວປະເທດ ພ້ອມທັງຄໍານຶງເຖິງປະຊາຊົນ ແລະ ພ້ອມທີ່ຈະຢູ່ຄຽງຂ້າງເຂົາເຈົ້າຕະຫຼອດໄປ  ທ້າຍສຸດນີ້ ຂ້າພະເຈົ້າຂໍພາວະນາຢ່າງຈິງໃຈໃຫ້ປະຊາຊົນມີແຕ່ຄວາມສຸກ ປະເທດຊາດໄດ້ຮັບການພັດທະນາຂຶ້ນໄປ ເລື້ອຍໆ ແລະ ຂໍໃຫ້ໂລກມີແຕ່ສັນຕິພາບ.

ແຫຼ່ງຂໍ້ມູນ ແລະ ຮູບພາບ: ສະຖານທູດຍີ່ປຸ່ນ