ສຳນັກຂ່າວຕ່າງປະເທດລາຍງານຈາກເມືອງ ຢ້າງກຸງ ປະເທດມຽນມາ ເມື່ອວັນທີ 17 ເມສາ 2019 ວ່າ ລັດຖະບານມຽນມາ ໄດ້ປ່ອຍນັກໂທດ 9.535 ຄົນ ໃນນັ້ນລວມເຖິງນັກໂທດທີ່ເປັນຊາວຕ່າງຊາດ 16 ຄົນ ທີ່ໄດ້ຮັບການອະໄພຍະໂທດ ເນື່ອງໃນໂອກາດເທດສະການວັນຂຶ້ນປີໃໝ່ຂອງຊາວພຸດມຽນມາ ທີ່ຮຽກວ່າ ຕິງຈັງ.

ຊາວຕ່າງຊາດ 16 ຄົນທີ່ໄດ້ຮັບການປ່ອຍຕົວຈະຖືກເນລະເທດອອກຈາກມຽນມາ, ທ່ານ ອ່ອງ ມຽນ ຈໍ ຕົວແທນກຸ່ມສິດທິມະນຸດ ທີ່ຊ່ວຍເຫຼືອນັກໂທດການເມືອງໃນມຽນມາໄດ້ເປີດເຜີຍວ່າ ໃນບັນດານັກໂທດທີ່ໄດ້ຮັບການອະໄພຍະໂທດໃນຄັ້ງນີ້ ມີນັກໂທດການເມືອງລວມຢູ່ 2 ຄົນ ແຕ່ບໍ່ລວມນັກຂ່າວ 2 ຄົນຂອງສຳນັກຂ່າວຣອຍເຕີ ເຊິ່ງຖືກສານຕັດສິນໃຫ້ຕິດຄຸກ 7 ປີ ໃນຄວາມຜິດຕາມກົດໝາຍຄວາມລັບຂອງຣາຊະການ ຈາກການລາຍງານຂ່າວຄວາມທາລຸນໂຫດຮ້າຍຂອງກອງທັບມຽນມາ ລະຫວ່າງປະຕິບັດການກວາດລ້າງຊົນກຸ່ມນ້ອຍໂຣຮິນຈາໃນລັດຍະໄຂ່.

ຈາກຂໍ້ມູນຂອງກຸ່ມ ເອເອພີພີ ປັດຈຸບັນຍັງເຫຼືອນັກໂທດການເມືອງຖືກຂັງຢູ່ໃນຄຸກທົ່ວມຽນມາມີທັງໝົດ 46 ຄົນ ແລະ ອີກປະມານ 300 ຄົນ ກຳລັງຖືກດຳເນີນຄະດີໃນສານ ໃນຂໍ້ຫາກ່ຽວກັບກິດະກຳທາງການເມືອງ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews