ເມື່ອວັນທີ 4 ຕຸລາ 2014 ຜ່ານມາ ສຳນັກຂ່າວຕ່າງປະເທດລາຍງານວ່າ ເກີດເຫດສະຫລົດໃຈທີ່ລັດພິຫານຂອງ
ອິນເດຍ ເມື່ອປະຊາຊົນເກີດຢຽບກັນຕາຍ ລະຫວ່າງເຂົ້າຮ່ວມເທດສະການສະເຫລີມສະຫລອງທາງສາສະໜາ
ຮິນດູ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 32 ຄົນ ບາດເຈັບຢ່າງໜ້ອຍ 24 ຄົນ.
ເຫດການນີ້ເກີດຂຶ້ນໃນເມືອງປັດຕະນາ ລັດພິຫານ ທາງຕອນເໜືອຂອງອິນເດຍ ລະຫວ່າງທີ່ຜູ້ຄົນກຳລັງແຫ່
ສະຫລອງເທດສະການດຸດເຊຣາ ເທດສະການທາງສາສະໜາຮິນດູ ໂດຍລະຫວ່າງທີ່ມີຜູ້ຄົນເຂົ້າຮ່ວມງານຢ່າງ
ໜາແໜ້ນນັ້ນ ຢູ່ໆຜູ້ຄົນກໍແຕກຕື່ນ ແລະ ຢຽບກັນຕາຍເດຍລະດາດ ໂດຍຜູ້ເຄາະຮ້າຍສ່ວນໃຫຍ່ເປັນຜູ້ຍິງ
ແລະ ເດັກນ້ອຍ ເຊິ່ງເບື້ອງຕົ້ນມີລາຍງານຜູ້ເສຍຊີວິດ 32 ຄົນ.
ສ່ວນສາເຫດຢຽບກັນຕາຍຄັ້ງນີ້ ຍັງບໍ່ທັນເປັນທີ່ຊັດເຈນ ແຕ່ຜູ້ທີ່ຢູ່ໃນເຫດການໄດ້ເປີດເຜີຍວ່າ ການຢຽບກັນ
ຕາຍ ເລີ່ມຂຶ້ນເມື່ອມີຄົນປ່ອຍຂ່າວລືວ່າ ສາຍໄຟຟ້າໄດ້ຫລຸດລົງມາໃສ່ກຸ່ມຄົນຢູ່ທາງລຸ່ມ ຜູ້ຄົນຈິ່ງພາກັນແລ່ນ
ໜີຕາຍ ເພາະຫວາດຫວັ່ນຢ້ານຈະເກີດອັນຕະລາຍຈາກໄຟຟ້າຊ໊ອດ ໃນຂະນະທີ່ທາງອອກທີ່ເປີດຢູ່ແມ່ນມີພຽງ
ທາງອອກດຽວເທົ່ານັ້ນ.
ທັງນີ້ ເຫດຢຽບກັນຕາຍເກີດຂຶ້ນຢ່າງເປັນປະຈຳໃນທຸກປີທີ່ປະເທດອິນເດຍ ໂດຍສະເພາະແມ່ນເທດສະການ
ແລະ ງານສະແຫວງບຸນຕ່າງໆ ໂດຍເມື່ອເດືອນຕຸລາຂອງປີກາຍນີ້ ກໍເຄີຍເກີດເຫດການຢຽບກັນຕາຍເທິງຂົວ
ແຫ່ງໜຶ່ງໃນລັດມັດທະຍະປະເທດ ຫລັງຈາກທີ່ມີການປ່ອຍຂ່າວລືວ່າ ຂົວກຳລັງຈະຖະຫລົ່ມ ສົ່ງຜົນເຮັດໃຫ້ມີ
ຜູ້ເສຍຊີວິດຈາກເຫດການຢຽບກັນຕາຍຄັ້ງນັ້ນ ສູງເຖິງ 115 ຄົນ.