ໃນວັນທີ 27 ມີນາ 2019 ທີ່ເກາະສະໝຸຍ ໄດ້ເປີດພິທີສົນທະນາເພື່ອໃຫ້ຜູ້ປະກອບການດ້ານການນຳທ່ຽວໄດ້ມີໂອກາດແລກປ່ຽນໃນວຽກງານການທ່ອງທ່ຽວ ເພື່ອດຶງດູດນັກທ່ອງທ່ຽວໃນອາຊຽນເຂົ້າມາທ່ອງທ່ຽວເກາະສະໝຸຍໃຫ້ນັບມື້ນັບຫຼາຍຂຶ້ນ.
ທ່ານ ວະລົງ ອິດສະຮະເສນາ ນະອະຍຸດທະຍາ ຮອງກໍາມະການຜູ້ອໍານວຍການໃຫຍ່ຝ່າຍການຂາຍບໍລິສັດການບິນ ບາງກອກແອເວ ໃຫ້ສຳພາດວ່າ: ປັດຈຸບັນພວກເຮົາພະຍາຍາມດຶງດູດນັກທ່ອງທ່ຽວບັນດາປະເທດໃນສະມາຊິກອາຊຽນເຂົ້າມາທ່ອງທ່ຽວໃນເກາະສະໝຸຍໃຫ້ນັບມື້ນັບຫຼາຍຂຶ້ນເວົ້າສະເພາະ, ເວົ້າລວມແມ່ນເຮັດໃຫ້ຕົວເລກການເພີ່ມຂຶ້ນຂອງນັກທ່ອງທ່ຽວທີ່ເຂົ້າມາປະເທດຂອງ ພວກເຮົາຫຼາຍຂຶ້ນກວ່າເກົ່າ, ນອກຈາກນັ້ນ, ພວກເຮົາເຫັນວ່າອາຊຽນກໍເປັນຕະຫຼາດໃຫຍ່ ແລະ ມີຂໍ້ອຳນວຍຄວາມສະດວກຫຼາຍຢ່າງ ໂດຍສະເພາະນັກທ່ອງທ່ຽວຈາກປະເທດລາວ, ກຳປູເຈຍ, ມຽນມາ, ຫວຽດນາມ ບັນດາປະເທດອ້ອມເຮົານີ້ເປັນປະເທດທີ່ມີສັກກາຍະພາບທາງດ້ານເສດຖະກິດທີ່ດີ ເປັນຕົ້ນນະຄອນຫຼວງວຽງຈັນ ເຊິ່ງປັດຈຸບັນເສດຖະກິດນັບມື້ນັບເຕີບໃຫຍ່ຂະຫຍາຍຕົວ ເຊິ່ງມັນໄດ້ສະແດງອອກທາງຖ້ຽວການບິນບາງກອກແອເວວຽງຈັນ-ກຸງເທບ-ເກາະສະໝຸຍ ປັດຈຸບັນມີ 2 ຖ້ຽວບິນ.
ນອກຈາກນັ້ນ, ບັນດາປະເທດສະມາຊິກອາຊຽນກໍເຫັນວ່າມີຫຼາຍປະເທດທີ່ໃຫ້ຄວາມສົນໃຈຫຼາຍສົມຄວນ ດັ່ງນັ້ນ, ພວກເຮົາຈຶ່ງຈັດການສົນທະນາຄັ້ງນີ້ຂຶ້ນມາໂດຍໄດ້ຕອບຮັບບໍລິສັດທ່ອງທ່ຽວ 7 ປະເທດເຂົ້າຮ່ວມຄື: ກຳປູເຈຍ, ລາວ, ມຽນມາ, ສິງກະໂປ, ຫວຽດນາມ, ຈີນ, ມາເລຍເຊຍ ເຊິ່ງພາຍໃນງານດັ່ງກ່າວໄດ້ເຮັດໃຫ້ຜູ້ປະກອບການທາງດ້ານການບໍລິການໂຮງແຮມ ແລະ ຜູ້ປະກອບການທ່ອງທ່ຽວແຕ່ລະປະເທດໄດ້ມີໂອກາດແລກປ່ຽນເຊິ່ງກັນ ແລະ ກັນ ພ້ອມທັງເປັນຄູ່ຮ່ວມດ້ານທຸລະກິດທີ່ດີໃນອະນາຄົດອີກດ້ວຍ.
ສຳລັບການສົນທະນາຄັ້ງນີ້ ສປປ ລາວ ມີ 10 ບໍລິສັດການທ່ອງທ່ຽວເຂົ້າຮ່ວມ.
ຂຽນໂດຍ: ແຟນຊິສ ສະຫວັນຄຳ