ປະທານາທິບໍດີ ມາດູໂຣ ໄດ້ຖະແຫຼງການຜ່ານສື່ໂທລະພາບເມື່ອວັນທີ 31 ມີນາ 2019 ວ່າ ໄດ້ອະນຸມັດແຜນສະລັບຕັດໄຟເປັນເວລາ 30 ວັນ ແຕ່ຍັງຈະຈ່າຍນໍ້າປະປາໃຫ້ໃຊ້ປົກກຕິ ພ້ອມທັງສັ່ງຫຼຸດເວລາເຮັດວຽກລົງ ແລະ ປິດໂຮງຮຽນຊົ່ວຄາວ ເພື່ອຫຼຸດຜ່ອນຜົນກະທົບຈາກວິກິດການໄຟຟ້າດັບຄັ້ງໃຫຍ່.
ມາດຕະການດັ່ງກ່າວເກີດຂຶ້ນຫຼັງຈາກລັດຖະບານບໍ່ສາມາດຜະລິດໄຟຟ້າໄດ້ພຽງພໍກັບຄວາມຕ້ອງການ ແລະ ວິກິດພະລັງງານເທື່ອນີ້ຍັງຄົງຍືດເຍື້ອຕໍ່ໄປເລື້ອຍໆ. ໂຄງສ້າງພື້ນຖານທີ່ເກົ່າແກ່ ຂາດການບຳລຸງຮັກສາ ແລະ ເກືອບບໍ່ມີງົບລົງທຶນຈາກທາງພາກລັດເປັນປັດໄຈທີ່ນຳມາສູ່ວິກິດພະລັງງານໃນຄັ້ງນີ້, ຂະນະທີ່ເສດຖະກິດຕົກຕ່ຳ ແລະ ອັດຕາເງິນເຟີ້ທີ່ສູງເປັນລ້ານໆເປີເຊັນ.
ການຂາດແຄນໄຟຟ້າ ເຮັດໃຫ້ສະຖານີສູບຈ່າຍນໍ້າປະປາບໍ່ສາມາດສົ່ງນໍ້າໄປທີ່ເຮືອນຂອງປະຊາຊົນໄດ້ ຄືກັບສັນຍານໄຟຈະລາຈອນ, ໄຟຖະໜົນ, ປໍ້ານໍ້າມັນ,ອິນເຕີເນັດ ແລະ ໂທລະສັບມືຖື.
ປັດຈຸບັນ, ເວເນຊູເອຣາສາມາດຜະລິດໄຟຟ້າໄດ້ພຽງ 5.500-6.000 ເມກະວັດ ຈາກເມື່ອກ່ອນເຄີຍມີກຳລັງການຜະລິດຫຼາຍເຖິງ 34.000 ເມກະວັດ. ລັດຖະບານເວເນຊູເອຣາ ໄດ້ອອກມາໂທດ ຜູ້ກໍ່ການຮ້າຍວ່າລົງມືໂຈມຕີສະຖານີຜະລິດໄຟຟ້ານໍ້າກູຣີ ໃນລັດໂບລິວາ ທີ່ຜະລິດໄຟຟ້າສະໜອງຄວາມຕ້ອງການ 80% ຂອງປະເທດ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook