ສຳນັກຂ່າວຊິນຫົວລາຍງານເມື່ອວັນທີ 26 ມີນາ 2019 ວ່າ ສານປະຊາຊົນຊັ້ນກາງຂອງນະຄອນໝິງໂປ ປະກາດຄຳຕັດສິນທ້າວ ຫຼູ່ ເຫວີ່ຍ ອະດີດຮອງຫົວໜ້າຝ່າຍການເຜີຍແຜ່ຂ່າວຂອງຄະນະກຳມະການກາງພັກຄອມມູນິດຈີນ ເຊິ່ງຖືກລົງໂທດໃຫ້ຕິດຄຸກເປັນເວລາ 14 ປີ ແລະ ປັບໄໝເງິນ 3 ລ້ານຢວນ ໃນຄະດີສວາຍໂອກາດຮັບສິນບົນ.
ຄຳຕັດສິນຂອງສານລະບຸວ່າ ເງິນ ແລະ ຊັບສິນທີ່ທ້າວ ຫຼູ່ ໄດ້ຮັບມາໃນຮູບແບບຮັບສິນບົນ ລວມເຖິງຜົນປະໂຫຍດຕ່າງໆທີ່ເກີດມາຈາກການຮັບສິນບົນນັ້ນ ຈະຖືກສອບສວນລາຍລະອຽດ ແລະ ຮຽກຄືນທັງໝົດກ່ອນຈະສົ່ງຕໍ່ໄປທີ່ສຳນັກງານຄັງເງິນແຫ່ງຊາດ.
ສານໄດ້ລະບຸວ່າ ທ້າວ ຫຼູ່ ຖືກກວດພົບການໃຊ້ຜົນປະໂຫຍດຈາກຕຳແໜ່ງໜ້າທີ່ໃນການຊ່ວຍເຫຼືອອົງກອນ ຫຼື ບຸກຄົນຈຳນວນໜຶ່ງທີ່ກ່ຽວຂ້ອງກັບການຈັດການທາງອິນເຕີເນັດ ລວມເຖິງການຊ່ວຍສົ່ງເສີມການປະກອບທຸລະກິດ, ການເລື່ອນຊັ້ນຕຳແໜ່ງ ແລະ ການໂຍກຍ້າຍງານໃນລະຫວ່າງປີ 2002-2017 ເຊິ່ງທ້າວ ຫຼູ່ ກໍ່ຍອມຮັບສາລະພາບທຸກຂໍ້ກ່າວຫາ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook