ໃນວັນ​ທີ 14 ມີນາ 2019, ທ່ານ ພັນ​ຄຳ ວິພາ​ວັນ ຮອງປະທານ​ປະ​ເທດ ​ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການ​ເຂົ້າ​ຢ້ຽມຂໍ່ານັບຂອງ ທ່ານ Finn E. KYDLAND ​ເຈົ້າ​ຂອງ​ລາງວັນ​ໂນ​ເບ​ສ ສາຂາ​​ເສດຖະສາດ ປະຈຳ​ປີ 2004 ​ແລະ ທ່ານ Sir Paul M. NURSE ​ເຈົ້າ​ຂອງ​ລາງວັນໂນ​ເບ​ສ ສາຂາ​ການ​ແພດ ປະຈຳ​ປີ 2001 ໃນ​ໂອກາດ​ເດີນທາງ​ມາຢ້ຽມຢາມ ​ແລະ ​ຈັດ​ກອງ​ປະຊຸມ​ເຜີຍ​ແຜ່ບົດຮຽນວິຊາ​ການ ​ໃນ​ຫົວ​ຂໍ້ ນະ​ໂຍບາຍ​ເສດຖະກິດ​ທີ່​ສອດຄ່ອງ ​ແລະ ການ​ພັດທະນ​າ​ເສດຖະກິດ ​ແລະ ຫົວ​ຂໍ້ ການ​ສ້າງ​ຈິນຕະນາການ​ໃໝ່ ທາງ​ດ້ານ​ສະຕິ​ປັນຍາ ສປປ ລາວ ລະຫວ່າງ​ວັນ​ທີ 8-15 ມີນາ 2019.

​ໃນ​ໂອກາດ​ນີ້, ທ່ານ ພັນ​ຄຳ ວິພາ​ວັນ ​ໄດ້​ກ່າວສະ​ແດງ​ຄວາມຍິນ​ດີຕ້ອນຮັບ, ຊົມ​ເຊີຍ ​ແລະ ຕີ​ລາຄາ​ສູງຕໍ່ ທ່ານ Finn E. KYDLAND ​ແລະ ທ່ານ Sir Paul M. NURSE ທີ່​ໄດ້​ເດີນທາງ​ມາ ຢ້ຽມຢາມ​ ​ແລະ ​ຈັດ​ກອງ​ປະຊຸມຢູ່ ສປປ ລາວ ​ໃນ​ຄັ້ງ​ນີ້, ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່​ນັກ​ຄົ້ນ ຄວ້າ​ທັງ​ສອງ​ທ່ານ ທີ່​ໄດ້​ເປີດ​ໂອກາດ​ ແບ່ງປັນຄວາມ​ຮູ້ ປະສົບ​ການ ​ໃນ​ການ​ຄົ້ນ​ຄວ້າ​ວິທະຍາສາດ ​ໃຫ້​ວິຊາ​ການ​ຂອງ​ລາວ​. ພ້ອມ​ທັງ​ສະ​ແດງ​ຄວາມ​ຫວັງ​ວ່າ ຈາກ​ການ​ແບ່ງ​ປັນ​ຄວາມ​ຮູ້​ ຂອງ​ນັກ​ຄົ້ນຄວ້າ ທັງ​ສອງ​ທ່ານ​ໃນ​ຄັ້ງ​ນີ້, ຈະ​ເປັນ​ພື້ນຖານອັນ​ດີ ​ໃຫ້​ແກ່​ນັກ​ຄົ້ນຄວ້າ​ຂອງລາວ ນຳ​ໄປ​​ເຜີຍ​ແຜ່ ​ແລ​ະ ໝຸນ​ໃຊ້​ເຂົ້າ​ໃນໜ້າທີ່​ວຽກງານ​ຂອງ​ຕົນ ​ໃຫ້​ດີ​ຂຶ້ນ​ເທື່ອ​ລະ​ກ້າວ.

ພ້ອມ​ດຽວກັນ​ນີ້, ນັກ​ຄົ້ນຄວ້າ​ທັງ​ສອງທ່ານ ​ກໍ​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ທ່ານ ພັນ​ຄຳ ວິພາ​ວັນ ທີ່​ໄດ້​ສະຫລະເວລາໃຫ້​ການ​ຕ້ອນ​ຮັບ​ອັນ​ອົບ​ອຸ່ນ​ໃນ​ຄັ້ງ​ນີ້, ພ້ອມທັງແຈ້ງຈຸດປະສົງ ຂອງການເດີນ ທາງມາຢ້ຽມຢາມ ສປປ ລາວ ​ຄັ້ງ​ນີ້, ​ໃຫ້ທ່ານຮອງປະທານ​ປະ​ເທດ ຮັບຊາບຕື່ມອີກ.

ຂຽນໂດຍ: ແຟນຊິສ ສະຫວັນຄຳ