ຫວຽດນາມວາງແຜນການແກ້ໄຂບັນຫາການຈະລາຈອນ ແລະ ມົນລະຜິດ ກຽມຫ້າມລົດຈັກແລ່ນຕາມຖະໜົນພາຍໃນປີ 2030 ປະຈຸບັນຫວຽດນາມກຳລັງພິຈາລະນາ 2 ແນວທາງຫຼຸດຈຳນວນລົດສ່ວນຕົວ, ທາງເລືອກທຳອິດຄືການຈຳກັດຈຳນວນລົດໃນເຂດຕົວເມືອງແລ້ວຄ່ອຍໆຫ້າມແລ່ນພາຍໃນປີ 2030, ສ່ວນອີກທາງເລືອກໜຶ່ງຄືການເກັບຄ່າທຳນຽມຍານພາຫະນະທີ່ແລ່ນເຂົ້າຕົວເມືອງຊັ້ນໃນ.

ທັງສອງແຜນຈະຖືກສົ່ງຕໍ່ໄປທີ່ຄະນະກຳມະການປະຊາຊົນ ແລະ ສະພານິຕິບັນຍັດນະຄອນຫຼວງຮ່າໂນ້ຍ ກ່ອນຈະນຳສະເໜີຕໍ່ລັດຖະບານ ແລະ ສະພາແຫ່ງຊາດພິຈາລະນາ.

ທ່ານ ຫງວຽນ ຕົງດອງ ຜູ້ອຳນວຍການດ້ານສິ່ງແວດລ້ອມຮ່າໂນ້ຍ ເຫັນດີກັບແຜນຄວບຄຸມ ແລະ ຫ້າມລົດຈັກແລ່ນ ເນື່ອງຈາກຍັງບໍ່ໄດ້ມາດຕະຖານກຳນົດການປ່ອຍອາຍພິດເຮືອນແກ້ວສຳລັບລົດຈັກຄ້າຍຄືກັບລົດໃຫຍ່ ຜົນການກວດກາຄຸນນະພາບອາກາດໃນໄລຍະ 3 ປີ ທີ່ຜ່ານມາພົບວ່າຄຸນນະພາບອາກາດຮ້າຍແຮງໃນໄລຍະທີ່ມີການຈະລາຈອນແອອັດ.

ຈຳນວນລົດໃນເມືອງຫຼວງເພີ່ມຂຶ້ນທຸກມື້, ລົດໃຫຍ່ ແລະ ລົດຈັກທີ່ຈົດທະບຽນຢູ່ຮ່າໂນ້ຍມີ 6 ລ້ານຄັນ ແລະ ອີກ 2 ລ້ານຄັນແມ່ນຈາກແຂວງອື່ນຕະຫຼອດຮອດລົດເຈົ້າໜ້າທີ່ຕຳຫຼວດ ແລະ ທະຫານອີກ 1 ລ້ານຄັນ.

ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ເສດຖະກິດ-ການຄ້າ