ວັນທີ່ 28 ກັນຍາ 2014 ແຫລ່ງຂ່າວຕ່າງປະເທດລາຍງານຈາກຈີນວ່າ ມີເຫດຊວນຕົກໃຈ ເກີດຂຶ້ນໃນເມືອງໜານຈິງ ມົນທົນຈຽງຊູ ປະເທດຈີນ ເປັນເລື່ອງພຶດຕິກຳສັບລາງສຸດເກັ່ງ ຂອງນາງຫລີ່ ເສີຍ ທີ່ແຕ່ງດອງກັບຜົວ 3 ຄົນ ແລະ ທຸກຄົນຕ່າງອາໄສຢູ່ໃນເຮືອນດຽວກັນ ແຕ່ບໍ່ມີຜູ້ຊາຍຄົນໃດຮູ້ເລີຍວ່າກຳລັງໃຊ້ເມຍຮ່ວມກັບຄົນອື່ນຢູ່ ເຫດການເຊັ່ນນີ້ດຳເນີນມາໄດ້ຢ່າງແນບນຽນເຖິງ 5 ປີ ກະທັ້ງຄວາມຈິງຖືກເປີດເຜີຍໃນທີ່ສຸດ
ກົນລະຍຸດການສັບລາງຂອງນາງ ຫລີ່ ເກີດຂຶ້ນໄດ້ເພາະຜົວທັງ 3 ຄົນຂອງນາງລ້ວນເປັນນັກທຸລະກິດທີ່ຕ້ອງເດິນທາງໄປເຮັດວຽກຕ່າງເມືອງເລື້ອຍໆ ຈຶ່ງບໍ່ຄ່ອຍໄດ້ຢູ່ເຮືອນ ນາງຫລີ່ກໍຈະຈັດຕາລາງໃຫ້ຜົວແຕ່ລະຄົນກັບມາໃນມື້ເວລາທີ່ບໍ່ກົງກັນ ແລະ ນາງກໍຈະຄອຍຖ້າປ່ຽນຮູບແຕ່ງງານລວມທັງຈັດຕຽມເສື້ອຜ້າຂອງຜົວໃຫ້ຖືກຄົນ
ແຕ່ ຄວາມກໍຕ້ອງມາແຕກເອົາເມື່ອຜົວຄົນໜຶ່ງກັບມາເຮືອນ ແລ້ວປັດກວາດເຊັດຖູເຮືອນ ແຕ່ຕອນເຮັດຄວາມສະອາດຢູ່ຊ້ຳພັດໄປເຈີຮູບແຕ່ງດອງຂອງເມຍຕົວເອງກັບຊາຍຄົນອື່ນອີກ 2ຄົນ ທັງຍັງພົບເສື້ອຜ້າຜູ້ຊາຍທີ່ບໍ່ແມ່ນຂອງຕົນອີກຫລາຍຊຸດ ຈຶ່ງສອບຖາມກັບນາງ ໃນທີ່ສຸດນາງຫລີ່ຈຶ່ງສານພາບວ່ານາງຍັງມີຜົວອີກ 2ຄົນ ແລະ ທຸກຄົນທັງໝົດຢູ່ຮ່ວມເຮືອນດຽວກັນມາ 5ປີແລ້ວ
ນາງຫລີ່ບອກວ່າທີ່ເຮັດແບບນີ້ລົງໄປກໍເພາະຮູ້ສຶກເຫງົາ ແຕ່ນາງກໍຮັກຜົວທັງ 3 ຢ່າງແທ້ຈິງ ຢ່າງໃດກໍດີຫລັງເລື່ອງລາວຖືກເປີດເຜີຍອອກມາ ນາງຫລີ່ກໍຖືກຈັບກຸມຕົວດ້ວຍຂໍ້ຫາຈົດທະບຽນສົມລົດຊ້ອນ ພ້ອມຖືກເຈົ້າຫນ້າທີ່ຕຳລວດສອບສວນເນື່ອງຈາກສົງໄສວ່ານາງອາດໃຊ້ບັດປະຊາຊົນປອມ ອີກດ້ວຍ