ໃນ​ວັນ​ທີ 5 ມີ​ນາ 2019 ທີ່​ນະ​ຄອນ​ຫລວງວຽງ​ຈັນ, ສະ​ພາ​ກາ​ຊາດ​ໄທ ໄດ້​ມອບ​ເຄື່ອງ​ຊ່ວຍ​ເຫລືອໃຫ້​ອົງ​ການ​ກາ​ແດງ​ລາວ ກ່າວມອບໂດຍ ທ່ານ ພົນໂທ ອຳນາດ ບາລີ ຜູ້ອຳນວຍການ ສຳນັກງານບັນເທົາທຸກ ສະພາກາຊາດໄທ, ກ່າວຮັບໂດຍ ທ່ານ ກາວີ ພອນສຸດທິ ຫົວໜ້າກອງຊ່ວຍເຫລືອບັນເທົາທຸກອົງການກາແດງລາວ, ມີ​ ທ່ານ ຄຳ​ຮຸ່ງ ເຮືອງວົງ​ສີ ປະ​ທານ​ອົງ​ການ​ກາ​ແດງ​ລາວ ຮ່ວມ​ເປັນ​ສັກ​ຂີ​ພິ​ຍານ, ພ້ອມ​ດ້ວ​ຍ​ພາກ​ສ່ວນ​ກ່ຽວ​ຂ້ອງ​ ເຂົ້າ​ຮ່ວມ.

ການ​ມອບ​ເຄື່ອງ​ຊ່ວຍ​ເຫລືອ​ດັ່ງ​ກ່າວ, ເພື່ອ​ເປັນການກະກຽມຄວາມພ້ອມໃນການຮັບມືກັບໄພພິບັດ ແລະ ໃຫ້ການຊ່ວຍເຫ​ລືອປະຊາຊົນຜູ້ທຸກຍາກຂາດເຂີນ, ຜູ້ປະສົບໄພພິບັດ ຢູ່ ສປປ ລາວ. ເຄື່ອງ​ຊ່ວຍ​ເຫລືອ​ໃນ​ຄັ້ງ​ນີ້ ​ປະ​ກອບ​ມີ ເຮືອກູ້ໄພພ້ອມດ້ວຍເຄື່ອງຈັກ 6 ຊຸດ, ມູນ​ຄ່າ 84.240 ໂດລາສະ​ຫະ​ລັດ, ຄອມພິວເຕີ 55 ຊຸດ, ມູນຄ່າ 16.000 ໂດລາ, ເຄື່ອງນຸ່ງຫົ່ມ ຈຳນວນ 5.868 ຜືນ ແລະ ຢາຖູແຂ້ວ 21 ແກັດ, ມູນຄ່າ 45.252 ໂດລາ, ລວມມູນຄ່າທັງໝົດ ​145.492 ໂດລາສະ​ຫະ​ລັດ.

ທ່ານ ພົນໂທ ອຳນາດ ບາລີ ແຈ້ງໃຫ້​ຮູ້​ວ່າ: ໃນ​ໄລ​ຍະ​ເກີດ​ໄພ​ພິ​ບັດ​ຈາກ​ອຸ​ປະ​ຕິ​ເຫດ ເຂື່ອນ​ເຊ​ປຽນ-​ເຊ​ນ້ຳ​ນ້ອຍ​ແຕກ ຢູ່​ເມືອງ​ສະ​ໜາມ​ໄຊ ແຂວງ​ອັດ​ຕະ​ປື ສະ​ພາ​ກາ​ຊາ​ດ​ໄທ ໄດ້​ມອບ​ເຮືອ​ກູ້​ໄພ​ຈຳ​ນວນ 3 ລຳ, ຖົງ​ຢັ່ງ​ຊີບ 3.000 ຖົງ, ພ້ອມ​ດ້ວຍ​ເຄື່ອງ​ຊ່ວຍ​ເຫລືອ​​ຈຳ​ນວນ​ໜຶ່ງ ແລະ ​ໄດ້​ສົ່ງ​ເຈົ້າ​ໜ້າ​ທີ່ຮ່ວມ​ປະ​ຕິ​ບັດ​ງານ​ຕອບ​ສະ​ໜອງ​ໄພ​ພິ​ບັດ​ລະ​ດັບ​ພາກ​ພື້ນ ດ້ານ​ການ​ບັນ​ເທົາ​ທຸກ, ສຸ​ຂະ​ອະ​ນາ​ໄມ, ລົງ​ໄປ​ພື້ນ​ທີ່​ປະ​ສົບ​ໄພ ​ເພື່ອ​ຊ່ວຍ​ເຫລືອ​ປະ​ຊາ​ຊົນ.

ຂຽນໂດຍ: ແຟນຊິສ ສະຫວັນຄຳ