ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມສະຫລຸບວຽກງານກະສິກຳ, ປ່າໄມ້ ແລະ ພັດທະນາຊົນນະບົດທົ່ວປະເທດ ປະຈຳປີ 2018 ແລະ ທິດທາງແຜນການປີ 2019 ໃນລະຫວ່າງວັນທີ 4-5 ມີນາ 2019 ຢູ່ນະຄອນຫລວງວຽງຈັນ,ໂດຍມີ ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງ, ຫົວໜ້າກົມ, ຮອງກົມ ພ້ອມດ້ວຍຜູ້ຕາງໜ້າ ຈາກຂະແໜງກະສິກຳ ໃນຂອບເຂດທົ່ວປະເທດ ເຂົ້າຮ່ວມ.
ໂອກາດດັ່ງກ່າວ, ທ່ານ ລຽນ ທິແກ້ວ ກ່າວວ່າ: ກອງປະຊຸມໃນຄັ້ງນີ້, ຈະໄດ້ພ້ອມກັນຄົ້ນຄວ້າລົງເລິກ ເບິ່ງບັນຫາໃຫ້ມີລັກສະນະຄົບຊຸດ, ຖືກຕົວຈິງ, ຖືກປະເດັນ, ເບິ່ງບັນຫາທີ່ກ່ຽວພັນ ລະຫວ່າງ ກະສິກຳ, ປ່າໄມ້, ພັດທະນາຊົນນະບົດ ແລະ ລຶບລ້າງຄວາມທຸກຍາກ ບົນພື້ນຖານການປ່ຽນແປງຄວາມຮັບຮູ້ເກົ່າ ໄປສູ່ການປ່ຽນແປງຈິນຕະນາການໃນການຄິດ, ການວາງແຜນ, ວິທີປະຕິບັດ, ເບິ່ງບັນຫາ, ຕີລາຄາສິ່ງທ້າທາຍຂອງວຽກງານກະສິກຳ, ປ່າໄມ້ ແລະ ແກ້ໄຂຄວາມທຸກຍາກ ທີ່ຈະປະເຊີນໃນຕໍ່ໜ້າ ແລະ ອື່ນໆ.
ໂອກາດດຽວກັນ, ທ່ານ ພວງປຣາລິສັກ ປຣະວົງວຽງຄຳ ຮອງລັດຖະມົນຕີກະຊວງກະລິກຳ ແລະ ປ່າໄມ້ ໄດ້ຂຶ້ນຜ່ານບົດສະຫລຸບສັງລວມ, ຕີລາຄາຮອບດ້ານ ກ່ຽວກັບການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະ ພັດທະນາຊົນນະບົດ ປະຈຳ ປີ 2018 ແລະ ທິດທາງແຜນການປະຈຳປີ 2019 ໂດຍມີບາງຕອນໃຫ້ຮູ້ວ່າ: ໃນໄລຍະຜ່ານມາ ການຈັດຕັ້ງປະຕິບັດວຽກງານ ໃນທົ່ວຂະແໜງກະສິກຳ, ປ່າໄມ້ ແລະ ພັດທະນາຊົນນະບົດ ຄະນະນຳກະຊວງ, ການນຳແຂວງ ແລະ ທົ່ວຂະແໜງການສາຍຕັ້ງ ແລະ ຂະແໜງການປິ່ນອ້ອມ ໄດ້ພ້ອມກັນເອົາໃຈໃສ່ຊີ້ນຳ-ນຳພາ ແລະ ໃຫ້ການສະໜັບສະໜູນຢ່າງໃກ້ຊິດ ເຊິ່ງສາມາດ ເຮັດໃຫ້ການຂະຫຍາຍຕົວ ຂອງລວມຍອດຜະລິດຕະພັນກະສິກຳ, ປ່າໄມ້ ຂະຫຍາຍຕົວໃນລະດັບ 2,8% ຂຶ້ນໄປ ກວມເອົາ 15,73% ຂອງໂຄງປະກອບເສດຖະກິດແຫ່ງຊາດ, ປະກອບສ່ວນເຮັດໃຫ້ GDP ຂະຫຍາຍຕົວບໍ່ຫລຸດ 7%, ຜະລິດເຂົ້າ ໄດ້ 4,2 ລ້ານໂຕນ, ກາເຟໄດ້ 137,500 ໂຕນ, ສາລີອາຫານສັດ ໄດ້ 1,2 ລ້ານກວ່າໂຕນ, ອ້ອຍ ໄດ້ 2 ລ້ານກວ່າໂຕນ, ຢາສູບໄດ້ 71 ພັນກວ່າໂຕນ, ມັນຕົ້ນໄດ້ 2,4 ລ້ານກວ່າໂຕນ ແລະ ອື່ນໆ.
ສຳລັບ ທິດທາງແຜນການປີ 2019 ກະຊວງກະສິກຳ ແລະ ປ່າໄມ້ ຈະສືບຕໍ່ສຸມໃສ່ວຽກງານການຜະລິດເຂົ້າ ແລະ ສົ່ງເສີມການລ້ຽງສັດ ແລະ ປາ ເພື່ອຮັບປະກັນດ້ານຄວາມໝັ້ນຄົງອັນຍາວນານ, ຮັບປະກັນ ໃຫ້ມີສະບຽງອາຫານພຽງພໍ, ມີສ່ວນແຮໄວ້ ແລະ ສາມາດເປັນພື້ນຖານ ຜະລິດເປັນສິນຄ້າໄດ້ ໃນໄລຍະຍາວນານ, ໂດຍບໍ່ໃຫ້ຂຶ້ນກັບ ແລະ ອາໃສແຕ່ທຳມະຊາດ ອີກຕໍ່ໄປ.
ຂຽນໂດຍ: ແຟນຊິສ ສະຫວັນຄຳ