ໃນວັນທີ 28 ກຸມພາ 2019 ນະຄອນຫລວງວຽງຈັນ ລັດຖະບານຢີ່ປຸ່ນໄດ້ເຊັນສັນຍາຊ່ວຍພັດທະນາຄວາມສາມາດຄົນພິການແຂວງຫົວພັນ ຈໍານວນ 2 ແສນກວ່າໂດລາ ລະຫວ່າງ ທ່ານ ທາເຄຊິ ຮິຄິຮາຣະ, ເອກອັກຄະຣາຊະທູດຢີ່ປຸ່ນປະຈໍາ ສປປ ລາວ ແລະ ທ່ານນາງ ໂທມິໂກະ ມາເອຈິມະ ປະທານອົງການພັດທະນາຄົນພິການອາຊີ ເຊິ່ງເປັນອົງການຈັດຕັ້ງທີ່ບໍ່ຂຶ້ນກັບລັດຖະບານຢີ່ປຸ່ນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ການຊ່ວຍເຫລືອຄັ້ງນີ້ເປັນຈໍານວນເງິນທັງໝົດ 274.459 ໂດລາ ໂດຍຈະນໍາໃຊ້ເຂົ້າໃນໂຄງການເປີດສູນສະໜັບສະໜູນການມີວຽກເຮັດງານທໍາ ແລະ ຝຶກອົບຮົມວິຊາຊີບໃຫ້ແກ່ຄົນພິການຢູ່ແຂວງຫົວພັນເປັນຕົ້ນ: ການຈັດສັນສວນ, ປູກຜັກ ແລະ ຝຶກອົບຮົມວິຊາຊີບໃຫ້ແກ່ເຂົາເຈົ້າ ເພື່ອບໍ່ໃຫ້ເປັນພະລະຂອງຄອບຄົວ.
ສໍາລັບອົງການພັດທະນາຄົນພິການອາຊີ ນີ້ໄດ້ເຄື່ອນໄຫວກິດຈະກໍາການຊ່ວຍເຫລືອຄົນພິການໃນ ສປປ ລາວ ແຕ່ປີ 1997 ເປັນຕົ້ນມາ ພາຍໃຕ້ການສະໜັບສະໜູນຈາກລັດຖະບານຢີ່ປຸ່ນ, ອົງການໄດ້ຈັດຕັ້ງນະໂຍບາຍຕ່າງໆເພື່ອເສີມສ້າງຄວາມສາມາດຂອງຄົນພິການທັງພາຍໃນນະຄອນຫລວງວຽງຈັນ ແລະ ແຂວງຫົວພົນ.
ຂຽນໂດຍ: ແຟນຊິສ ສະຫວັນຄຳ
ຮູບພາບ: ADDP Laos