ໃນວັນທີ 28 ກຸມພາ 2019, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຢາມຂໍ່ານັບຂອງ ທ່ານ ນໍເບີດ ບາດໂທ (Norbert Barthle) ຮອງລັດຖະມົນຕີກະຊວງຮ່ວມມື, ເສດຖະກິດ ແລະ ການພັດທະນາ ແຫ່ງ ສ.ເຢຍລະມັນ, ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ.
ທ່ານ ສະເຫລີມໄຊ ກົມມະສິດ ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈເປັນຢ່າງສູງ ຕໍ່ການຊ່ວຍເຫລືອອັນລໍ້າຄ່າຂອງ ເຢຍລະມັນ ແກ່ ສປປ ລາວ ເຊິ່ງ ເຢຍລະມັນ ເປັນປະເທດລະດັບຕົ້ນໆ ທີ່ໃຫ້ການຊ່ວຍເຫລືອ ແລະ ສະໜັບສະໜູນ ສປປ ລາວ ຕະຫລອດມາ ໂດຍສະເພາະ ແມ່ນການຊ່ວຍເຫລືອປະຊາຊົນ ຜູ້ທີ່ຖືກຜົນກະທົບຈາກໄພນໍ້າຖ້ວມ ຢູ່ເມືອງ ສະໜາມໄຊ ແຂວງອັດຕະປື ແລະ ໃນແຂວງອື່ນທົ່ວປະເທດ. ນອກຈາກນີ້, ຍັງໄດ້ສະເໜີໃຫ້ສືບຕໍ່ຊຸກຍູ້ການຊ່ວຍເຫລືອເພື່ອການພັດທະນາແກ່ ສປປ ລາວ ໃຫ້ນັບມື້ນັບເພີ່ມຂຶ້ນໃນຊຸມປີຕໍ່ໜ້າ ເຊັ່ນ: ວຽກງານອາຊີວະສຶກສາ, ການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ (SME).
ພ້ອມນີ້, ຍັງໄດ້ສະເໜີໃຫ້ສອງຝ່າຍຊຸກຍູ້ມີການແລກປ່ຽນການຢ້ຽມຢາມ ຂອງຄະນະຜູ້ແທນທັງສອງປະເທດໃຫ້ຫລາຍຂື້ນ ແລະ ຊ່ວຍຊຸກຍູ້ນັກທຸລະກິດ, ນັກລົງທຶນ ແລະ ເຊີນຊວນປະຊາຊົນ, ນັກທ່ອງທ່ຽວເຢຍລະມັນມາທ່ອງທ່ຽວ ແລະ ລົງທຶນຢູ່ລາວ ໃຫ້ຫລາຍຂຶ້ນໃນຊຸມປີຕໍ່ໜ້າ. ທັງສອງຝ່າຍ ຍັງໄດ້ສະແດງຄວາມຊົມເຊີຍໃນປີ 2018 ທີ່ຜ່ານມາ ເຊິ່ງເປັນປີແຫ່ງການສ້າງຕັ້ງສາຍພົວພັນການທູດ ລາວ-ເຢຍລະມັນ ຄົບຮອບ 60 ປີ ແລະ ການຮ່ວມມື ລາວ-ເຢຍລະມັນ ຄົບຮອບ 55 ປີ ທີ່ໄດ້ຮ່ວມກັນຈັດກິດ ຈຳກຳສະເຫລີມສະຫລອງ ວັນສຳຄັນດັ່ງກ່າວ ອັນເປັນມິດໝາຍໃໝ່ ໃຫ້ແກ່ການຮັດແໜ້ນ ສາຍພົວພັນຮ່ວມມື ຂອງສອງປະເທດ ໃຫ້ນັບມື້ດີຂຶ້ນ.
ໃນໂອກາດດຽວກັນ, ທ່ານ ນໍເບີດ ບາດໂທ ກໍໄດ້ສະແດງຄວາມຂອບໃຈ ຕໍ່ທ່ານ ສະເຫລີມໄຊ ກົມມະສິດ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການພົວພັນຮ່ວມມື ອັນດີງາມທີ່ມີມູນເຊື້ອ ມາແຕ່ຍາວນານ ລະຫວ່າງສອງປະເທດ ໃນໄລຍະຜ່ານມາເຖິງປັດຈຸບັນ ແລະ ຈະສືບຕໍ່ຮັກສາມູນເຊຶ້ອ ພ້ອມທັງເສີມຂະຫຍາຍໃຫ້ນັບມື້ນັບດີຂຶ້ນ ເພື່ອເຮັດໃຫ້ການພົວພັນຮ່ວມມືຂອງສອງຝ່າຍ ໄດ້ຮັບການພັດທະນາ ແລະ ເກີດດອກອອກຜົນຍິ່ງໆຂຶ້ນ.
ສປປ ລາວ ແລະ ສສ ເຢຍລະມັນ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 31 ມັງ ກອນ 1958. ຜ່ານມາ ເຢຍລະມັນ ໄດ້ໃຫ້ການຮ່ວມມືຊ່ວຍເຫລືອແກ່ ສປປ ລາວ ໃນສອງຂະແໜງການບຸລິມະສິດ ຄື: ການຮ່ວມມືທາງດ້ານເຕັກນິກ ແລະ ການຮ່ວມມືທາງດ້ານການເງິນ, ໂດຍອີງໃສ່ ເປົ້າໝາຍລວມຂອງແຜນພັດທະນາເສດຖະກິດ-ສັງຄົມ ຂອງລັດຖະບານລາວ ໄດ້ເນັ້ນໜັກໃສ່ການພັດທະນາຊົນນະບົດ, ວຽກງານອາຊີວະສຶກສາ, ການພັດທະນາເສດຖະກິດແບບຍືນຍົງ, ການພັດທະນາຊັບພະ ຍາກອນມະນຸດ, ການອະນຸລັກສິ່ງແວດລ້ອມ, ກໍ່ສ້າງ ແລະ ປັບປຸງເສັ້ນທາງຄົມມະນາຄົມ ແລະ ສົ່ງເສີມທຸລະກິດພາກເອກະຊົນ.
ມາເຖິງປັດຈຸບັນ ເຢຍລະມັນ ໄດ້ໃຫ້ການຊ່ວຍເຫລືອແກ່ ສປປ ລາວ ມີມູນຄ່າປະມານ 427,1 ລ້ານເອີໂຣ.
ຂຽນໂດຍ: ແຟນຊິສ ສະຫວັນຄຳ
ຮູບພາບ: Germanyinlaos