ຈາກກໍລະນີ ໂຄສົກກອງທັບປາກິດສະຖານ ຖະແຫຼງວ່າກອງທັບປະກິດສະຖານໄດ້ຍິງເຮືອບິນກອງທັບອາກາດອິນເດຍຕົກລົງ 2 ລໍາ ໃນບໍລິເວນພື້ນທີ່ ທີ່ມີຄວາມຂັດແຍ່ງໃນດິນແດນແຄສເມຍ ໂດຍເຄື່ອງບິນລໍາໜຶ່ງຕົກລົງພື້ນທີ່ໃນເຂດຄວບຄຸມຂອງອິນເດຍ ແລະ ອີກລໍາໜຶ່ງຕົກລົງໃນພື້ນທີ່ຄວບຄຸມຂອງປາກິດສະຖານ, ຖະແຫຼງການດັ່ງກ່າວມີຂຶ້ນ ຫຼັງມີລາຍງານວ່າເຄື່ອງບິນກອງທັບທາງອາກາດຂອງປາກິດສະຖານລະເມີດນ່ານຟ້າຂອງອິນເດຍກ່ອນ.
ເວັບໄຊ ຂ່າວສົດ ຂອງໄທ ລາຍງານ ຕອນເຊົ້າຂອງວັນທີ 28 ກຸມພາ 2019, ວ່າ: ທ່ານ ສຸເມດ ດໍາຣົງໄຊຍະທໍາ ກໍາມະການຜູ້ອໍານວຍການໃຫ່ຍ ບໍລິສັດການບິນໄທ ຈໍາກັດ ເປີດເຜີຍວ່າ ຫຼັງຈາກເກີດສະຖານະການຄວາມຂັດແຍ່ງລະຫວ່າງປະເທດ ປາກິດສະຖານ ແລະ ປະເທດ ອິນເດຍ ຈຶ່ງເຮັດໃຫ້ມີການປະກາດປິດນ່ານຟ້າ ໂດຍໃນເບື້ອງຕົ້ນການບິນໄທ ໄດ້ປະສານກັບເຮືອບິນທີ່ກໍາລັງບິນຢູ່ເທິງນ່ານຟ້າ ເພື່ອໄປເອີຣົບປະມານ 3-4 ລໍາ ໃຫ້ກັບມາລົງທີ່ປະເທດໄທກ່ອນ ໂດຍມີຖ້ຽວບິນຈາກບາງກອກ-ແຟງເຟີຣດ, ບາງກອກ-ລອນດອນ.
ພ້ອມນັ້ນ, ເວັບໄຊຂ່າວສົດ ລາຍງານຕື່ມວ່າ: ໃນການປິດນ່ານຟ້າຄັ້ງນີ້, ຈະສົ່ງຜົນກະທົບກັບຖ້ຽວບິນທີ່ບິນໄປເອີຣົບທຸກເສັ້ນທາງ. ສໍາລັບຖ້ຽວບິນທີ່ກໍາລັງຈະອອກເດີນທາງໃນຕອນຄໍ່າມື້ນີ້ ຈະໄດ້ເອີ້ນປະຊຸມດ່ວນ ເພື່ອພິຈາລະນາຜົນກະທົບຈາກເຫດການດັ່ງກ່າວ. ທັງນີ້, ການບິນໄທ ມີເສັ້ນທາງການບິນໄປເອີຣົບເຖີງ 13 ເສັ້ນທາງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: khaosod.co.th
ຮູບພາບຈາກ: thainews.prd.go.th