ຍານພາຫະນະທຸກປະເພດທີ່ໄດ້ຮັບອະນຸຍາດໃຫ້ນຳເຂົ້າມານຳໃຊ້ຢ່າງຖາວອນ ຢູ່ ສປປ ລາວ ຕ້ອງມີສະພາບ ແລະ ມາດຕະຖານເຕັກນິກຄົບຖ້ວນ ຫຼື ບໍ່ມີການປ່ຽນແປງລະບົບໂຄງສ້າງເດີມຂອງລົດທີ່ຜະລິດຈາກໂຮງງານ, ໃຊ້ງານໄດ້ເປັນປົກກະຕິ.
ເພື່ອປ້ອງກັບການເກີດອຸບັດຕິເຫດຈາກການນຳໃຊ້ພາຫະນະທີ່ບໍ່ໄດ້ມາດຕະຖານເຕັກນິກ ດັ່ງນັ້ນ, ລົດທຸກຄັນຕ້ອງໄດ້ຮັບການກວດກາເຕັກນິກ ຕາມເວລາທີ່ກຳນົດໄວ້ ແລະ ໄດ້ຮັບການຢືນຢັນມາດຕະຖານເຕັກນິກຈາກໜ່ວຍງານກວດກາເຕັກນິກຢ່າງຖືກຕ້ອງ ແລະ ເຂັ້ມງວດ ເປັນຕົ້ນແມ່ນລະບົບຈັກ, ລະບົບຊ່ວງລ່າງ, ລະບົບຫ້າມລໍ້, ຢາງຕີນລົດ, ລະບົບໄຟເຍືອງໜ້າ-ຫຼັງ, ໄຟສັນຍານຄົບຊຸດ, ມີແວ່ນສ່ອງຫຼັງ ແລະ ທໍ່ຄວັນ.
ໃນມາດຕາ 147 ໄດ້ລະບຸວ່າ ຫາກບຸກຄົນໃດນຳໃຊ້ພາຫະນະທີ່ບໍ່ໄດ້ມາດຕະຖານເຕັກນິກ ແລ້ວພາໃຫ້ເກີດອຸບັດຕິເຫດ ແລະ ເຮັດໃຫ້ບຸກຄົນອື່ນໄດ້ຮັບບາດເຈັບ ຈະຖືກລົງໂທດຕັດອິດສະຫຼະພາບ ແຕ່ ສາມເດືອນ ຫາ ສອງປີ ແລະ ຈະຖືກປັບໃໝແຕ່ 3.000.000 ກີບ ຫາ 15.000.000 ກີບ.
ໃນກໍລະນີທີ່ກະທຳຜິດ ແລະ ພາໃຫ້ຄົນບາດເຈັບສາຫັດ, ເສຍອົງຄະ ຫຼື ພິການ ຈະຖືກລົງໂທດຕັດອິດສະຫຼະພາບ ແຕ່ 2 ປີ ຫາ 5 ປີ ແລະ ຈະຖືກປັບໃໝ ແຕ່ 5.000.000 ກີບ ຫາ 20.000.000ກີບ.
ໃນກໍລະນີທີ່ການກະທຳຜິດ ຫາກພາໃຫ້ຄົນເສຍຊີວິດ ຈະຖືກລົງໂທດຕັດອິດສະຫຼະພາບ ແຕ່ 6 ປີ ຫາ 10 ປີ ແລະ ຈະຖືກປັບໃໝແຕ່ 7.000.000 ກີບ ຫາ 30.000.000ກີບ.
ໃນກໍລະນີທີ່ການກະທຳຜິດ ຫາກພາໃຫ້ມີຄົນເສຍຊີວິດແຕ່ສອງຄົນຂຶ້ນໄປ ຈະຖືກລົງໂທດຕັດອິດສະຫຼະພາບແຕ່ 8 ປີ ຫາ 15 ປີ ແລະ ຈະຖືກປັບໃໝ ແຕ່ 10.000.000 ກີບ ຫາ 50.000.000ກີບ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ຂໍ້ກຳນົດກ່ຽວກັບມາດຕະຖານເຕັກນິກ ຍານພາຫະນະ