ນາງ ອໍາພອນ ປະຊາຊົນບ້ານເວີນແຄນ ເມືອງມຸນລະປາໂມກ ໄດ້ຮັບຊັບຂອງຕົນຄືນ ເປັນຄໍາ 2 ບາດ ກັບ 5 ຫຸນ ພາຍຫຼັງຖືກທ້າວ ເຕື່ອຍ ແລະ ເມຍ ສໍ້ໂກງ, ນາງ ອໍາພອນ ດີໃຈ ແລະ ກ່າວ ຕໍ່ໄປວ່າ : ຈະບໍ່ເຊື່ອຄົນງ່າຍອີກແລ້ວ.
ການມອບຊັບຄັ້ງນີ້ມີຂຶ້ນໃນວັນທີ 19 ກັນຍາ 2014 ທີ່ຜ່ານມາ ຢູ່ພະແນກສືບສວນ-ສອບສວນ ປກສ ແຂວງຈໍາປາສັກ ເປັນກຽດມອບໂດຍທ່ານ ນາງ ຮ້ອຍເອກ ມະນີວອນ ຕາງໜ້າເຈົ້າໜ້າທີ່ພະແນກສືບສວນ-ສອບສວນ ປກສ ແຂວງ, ຮັບໂດຍທ່ານ ນາງ ອໍາພອນ ຜູ້ທີ່ຖືກສໍ້ໂກງຊັບ ຊຶ່ງນາງໄດ້ກ່າວຄໍາຂອບໃຈຕໍ່ເຈົ້າໜ້າທີ່ ພ້ອມທັງກ່າວຢືນຢັນຕໍ່ໄປວ່າຈະບໍ່ເຊື່ອຄົນງ່າຍໆອີກແລ້ວ.
ທ່ານ ຮ້ອຍໂທ ພູວົງ ຕຸ້ມທອງພິມ ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງຈໍາປາສັກໃຫ້ຂໍ້ມູນວ່າ: ໃນວັນທີ 17 ກັນຍາ 2014 ທີ່ຜ່ານມາ ພາຍຫຼັງເຈົ້າໜ້າທີ່ພວກເຮົາໄດ້ຮັບແຈ້ງຄວາມຈາກທ້າວ ໂດ່ ແລະ ນາງ ອໍາພອນ ອາຊີບເຮັດນາ ຢູ່ບ້ານເວີນແຄນ ເມືອງມຸນລະປາໂມກວ່າ: ໃນວັນທີ 16 ກັນຍາ ມີຜົວເມຍຄູ່ໜຶ່ງຂີ່ລົດເກັງ ຍີ່ຫໍ້ເກຍ ສີຂາວ ບໍ່ຕິດປ້າຍທະບຽນ ໄປເຄື່ອນໄຫວໂຄສະນາເທີນລົດ ແລະ ດາວລົດ ດ້ວຍຮູບແບບຈ່າຍຜ່ອນບໍ່ມີດອກເບ້ຍ ແຕ່ໃຫ້ຈ່າຍກ່ອນຕາມທ່າແຮງ, ພວກຕົນເລີຍສົນໃຈຢາກໄດ້ລົດເລີຍເຂົ້າໄປສອບຖາມໂອ້ລົມກັບພວກກ່ຽວ ແລະ ໄດ້ຕົກລົງກັບພວກກ່ຽວວ່າຈະດາວລົດວີໂກ້ ໃນລາຄາ 148 ລ້ານກີບ ໂດຍໃຫ້ຈ່າຍຜ່ອນໃນກໍານົດ 6 ປີບໍ່ມີດອກເບ້ຍ ແລະ ໄດ້ຕົກລົງໃຫ້ພວກຕົນຈ່າຍກ່ອນເປັນຄໍາ 2 ບາດ ກັບ 5 ຫຸນ, ໃນນັ້ນສາຍຄໍ 1 ບາດ, ສາຍແຂນ 1 ບາດ ຕີເປັນເງິນ 9 ລ້ານກີບ ແລະ ແຫວນ 5 ຫຸນ, ເມື່ອຕົກລົງກັນໄດ້ແລ້ວ ວັນທີ 17 ກັນຍາ ພວກກ່ຽວກໍ່ພາຂຶ້ນມາປາກເຊ ເພື່ອເບິ່ງລົດ ເມື່ອມາຮອດປາກເຊພວກກ່ຽວຊວນໄປກິນເຂົ້າຢູ່ຕະຫຼາດໂອທັອບ(ຕະຫຼາດສູນການຄ້າ),ໂດຍບອກໃຫ້ພວກຕົນລົງລົດ ແລະ ເຂົ້າໄປນັ່ງຖ້າ ເພາະພວກກ່ຽວວ່າຈະຊອກບ່ອນຈອດລົດກ່ອນຈິ່ງຈະເຂົ້າໄປນໍາຫຼັງ, ພວກຕົນກໍ່ເຂົ້າໄປນັ່ງຖ້າດົນເຕີບ ແຕ່ບໍ່ເຫັນພວກກ່ຽວຕາມມາ. ເມື່ອໄດ້ຮັບແຈ້ງຄວາມແນວນັ້ນເຈົ້າໜ້າທີ່ພວກເຮົາກໍ່ໄດ້ແຈ້ງໃຫ້ເຈົ້າໜ້າທີ່ສາຍກວດທີ່ປະຈໍາຢູ່ແຕ່ລະຈຸດ ກວດກາຕິດຕາມລົດເປົ້າໝາຍ ແລະ ໃນທີ່ສຸດກໍ່ສາມາດກັກຕົວພວກກ່ຽວໄດ້ຢູ່ເຂດກິໂລແມັດທີ 9 ບ້ານໜອງຫອຍ ເມືອງຊະນະສົມບູນ.
ທ່ານ ຮ້ອຍໂທ ພູວົງ ໃຫ້ຮູ້ຕື່ມວ່າ: ຜົວເມຍທີ່ເຄື່ອນໄຫວສໍ້ໂກງຊັບພົນລະເມືອງໃນຄັ້ງນີ້ ຜົວຊື່ທ້າວ ເຕື່ອຍ ອາຍຸ 29 ປີ, ເມຍຊື່ນາງ ວິໄລພອນ, ປັດຈຸບັນຢູ່ບ້ານໂຮງເລື່ອຍມີໄຊ ເມືອງຄົງເຊໂດນ ແຂວງສາລະວັນ, ຜ່ານການສືບສວນ-ສອບສວນຂອງເຈົ້າໜ້າທີ່ທ້າວ ເຕື່ອຍຮັບສາລະພາບວ່າ: ຜ່ານມາໄດ້ຮ່ວມກັບເມຍເຄື່ອນໄຫວສໍ້ໂກງຊັບພົນລະເມືອງລັກສະນະດຽວກັນນີ້ໃນ 5 ແຂວງພາກໃຕ້ຄື: ສະຫວັນນະເຂດ, ຈໍາປາສັກ, ສາລະວັນ, ອັດຕະປື ແລະ ເຊກອງ ລວມທັງໝົດ 16 ຄັ້ງ ແລະ ການເຄື່ອນໄຫວສໍ້ໂກງໃນທີ່ຜ່ານມາໄດ້ເງິນຕໍ່າສຸດ 3 ລ້ານກີບ/ຄັ້ງ, ສູງສຸດ 20 ລ້ານກີບ/ຄັ້ງ, ຄັ້ງທີ 17 ຈິ່ງຖືກເຈົ້າໜ້າທີ່ກັກຕົວໄດ້.
ດັ່ງນັ້ນຖ້າວ່າປະຊາຊົນທ່ານໃດທີ່ຖືກຜົວເມຍຄູ່ນີ້ສໍ້ໂກງຊັບສິນໃນທີ່ຜ່ານມາ ກໍ່ຂໍໃຫ້ເຂົ້າໄປແຈ້ງຕໍ່ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງຈໍາປາສັກໄດ້ໃນໂມງລັດຖະການ.ປັດຈຸບັນຄະດີດັ່ງກ່າວເຈົ້າໜ້າທີ່ກໍາລັງຮວບຮວມຫຼັກຖານ ເພື່ອສົ່ງໄອຍະການດໍາເນີນຄະດີຕາມຂັ້ນຕອນຂອງກົດໝາຍກໍານົດອອກ.
ຂ່າວ-ພາບ: ທູນທອງໃຈ ໜັງສືພິມຈຳປາໃໝ່