ສຳນັກຂ່າວຕ່າງປະເທດລາຍງານ ເມື່ອວັນທີ 24 ກຸມພາ 2019 ວ່າ ຕົວເລກຜູ້ເສຍຊີວິດຈາກພິດເຫຼົ້າເຖື່ອນລະບາດ ທາງພາກຕາເວັນອອກສຽງເໜືອຂອງປະເທດ ອິນເດຍ ເພີ່ມສູງຂຶ້ນເປັນ 150ສົບ ພ້ອມກັບມີປະຊາຊົນອີກປະມານ 170 ຄົນ ເຂົ້າຮັກສາຕົວທີ່ໂຮງໝໍ ໂດຍສາເຫດມາຈາກການບໍລິໂພກເຫຼົ້າເຖື່ອນ ເຮັດໃຫ້ເກີດບັນຫາເຫຼົ້າເປັນພິດຕໍ່ຮ່າງກາຍ.

ເຫດການດັ່ງກ່າວເກີດຂຶ້ນເມື່ອວັນພະຫັດທີ່ຜ່ານມາ ຜູ້ບາດເຈັບ ແລະ ຜູ້ເສຍຊີວິດສ່ວນຫຼາຍເປັນຄົນງານສວຍຊາ ທີ່ໄດ້ດື່ມເຫຼົ້ານຳກັນທີ່ໂຮງນໍ້າຊາແຫ່ງໜຶ່ງໃນເມືອງ ໂກລາກັດ ລັດອັສສຳ ປະກົດວ່າໃນເຊົ້າວັນຕໍ່ມາ ມີຫຼາຍຄົນຖືກນຳຕົວສົ່ງໂຮງໝໍ ແລະ ມີອາການຊັອກຈົນເສຍຊີວິດເປັນຈຳນວນຫຼາຍ.

ທັງນີ້, ທາງເຈົ້າໜ້າທີ່ອິນເດຍຍັງຢູ່ໃນລະຫວ່າງການສືບສວນ-ສອບສວນທີ່ມາຂອງເຫດການຄັ້ງນີ້ ໂດຍເຊື່ອວ່າຕົວເລກຜູ້ເສຍຊີວິດຍັງຈະເພີ່ມຂຶ້ນອີກ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews