ອຸບັດຕິເຫດບໍ່ມີໃຜຢາກໃຫ້ມັນເກີດຂຶ້ນ ເພາະນອກຈາກຈະສ້າງຄວາມເສຍຫາຍໃຫ້ແກ່ຄູ່ກໍລະນີ, ສ້າງຄວາມຫຍໍ້ທໍ້ທາງສັງຄົມ ຍັງມີຄົນທີ່ໄດ້ຮັບບາດເຈັບ, ເສຍອົງຄະ ຫຼື ພິການ ຈົນເຖິງຂັ້ນເສຍຊີວິດກໍມີຈໍານວນຫຼາຍ, ເມື່ອອຸບັດຕິເຫດເກີດຂຶ້ນແລ້ວຜູ້ໄດ້ຮັບເຄາະຮ້າຍ ຫຼື ຄອບຄົວຜູ້ເສຍຊີວິດຈາກອຸບັດຕິເຫດມີສິດຮຽກຮ້ອງຄ່າເສຍຫາຍ, ຄ່າປິ່ນປົວແນວໃດ?
ອີງຕາມການປະມວນກົດໝາຍອາຍາ ເລກທີ 118/ປປທ, ວັນທີ 26 ມິຖຸນາ 2017, ມາດຕາ 145 ວ່າດ້ວຍການລະເມີດຈະລາຈອນທີ່ພາໃຫ້ເກີດອຸບັດຕິເຫດໄດ້ລະບຸວ່າ: ຖ້າບຸກຄົນໃດຫາກລະເມີດກົດຈະລາຈອນ ແລ້ວພາໃຫ້ເກີດອຸບັດຕິດເຫດ ແລະ ເຮັດໃຫ້ຄົນອື່ນໄດ້ຮັບບາດເຈັບ ຈະຖືກປັບໃໝແຕ່ 1.000.000-5.000.000 ກີບ; ໃນກໍລະນີມີຄົນເຈັບສາຫັດ, ເຈັບຫຼາຍຄົນ, ເສຍອົງຄະ ຫຼື ພິການ ຈະຖືກລົງໂທດຕັດອິດສະຫຼະພາບແຕ່ 6 ເດືອນ ຫາ 3 ປີ ແລະ ຈະຖືກປັບໃໝແຕ່ 4.000.000-15.000.000 ກີບ; ຖ້າມີຄົນເສຍຊີວິດຈະຖືກລົງໂທດຕັດອິດສະຫຼະພາບແຕ່ 2-5 ປີ ແລະ ຈະຖືກປັບໃໝແຕ່ 5.000.000-20.000.000 ກີບ, ເສຍຊີວິດນັບແຕ່ 2 ຄົນຂຶ້ນໄປ ຈະຖືກລົງໂທດຕັດອິດສະຫຼະພາບແຕ່ 5-10 ປີ ແລະ ຈະຖືກປັບໃໝແຕ່ 5.000.000-50.000.000 ກີບ.
ຈາກການສອບຖາມ ເພຈ ກົດໝາຍລາວ Law of Laos ທີ່ໃຫ້ຄໍາປຶກສາດ້ານກົດໝາຍ ເວົ້າວ່າ: ຕໍ່ກັບກໍລະນີ້ດັ່ງກ່າວ ທີ່ປະຕິບັດຕາມກົດໝາຍນັ້ນ ຖ້າລົດທີ່ເກີດອຸບັດຕິເຫດເຮັດໃຫ້ມີຜູ້ບາດເຈັບ, ພິການ, ເສຍຊີວິດ ແລະ ອື່ນໆ ມີປະກັນໄພ ກໍຈະແມ່ນບໍລິສັດປະກັນໄພເປັນຜູ້ໄກ່ເກ່ຍເອງ ເປັນຕົ້ນຄ່າສົ່ງສະການຜູ້ເສຍຊີວິດ ແລະ ຄ່າເສຍຫາຍອື່ນໆ ແຕ່ຖ້າບໍ່ມີປະກັນໄພຜູ້ກະທໍາຜິດຕ້ອງຮັບຜິດຊອບຕາມຂັ້ນຕອນຂອງກົດໝາຍ. ນອກຈາກ, ຜູ້ກະທໍາຜິດໄດ້ປະຕິບັດຕາມກົດໝາຍວາງອອກແລ້ວ ທາງຄອບຄົວຜູ້ເສຍຫາຍ ຫຼື ຄອບຄົວຂອງຜູ້ເສຍຊີວິດ ຍັງມີສິດຮຽກຮ້ອງຄ່າເສຍຫາຍເປັນເງິນມູນຄ່າບໍ່ຫຼຸດ 25.000.000 ກີບ ເພື່ອເປັນຄ່າປິ່ນປົວເບິ່ງແຍງຜູ້ບາດເຈັບ ຫຼື ຄ່າສົ່ງສະການຜູ້ເສຍຊີວິດ.
ຂຽນໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ປະມວນກົດໝາຍອາຍາ 2017, ເພຈ ກົດໝາຍລາວ Law of Laos
ຮູບພາບຈາກ: ໜ່ວຍກູ້ໄພມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ 1623