ການເຈລະຈາດ້ານການຄ້າລະຫວ່າງສອງປະເທດມະຫາອຳນາດຈີນ-ສະຫະລັດ ໄດ້ຈັດຂຶ້ນລະຫວ່າງວັນທີ 11-15 ກຸມພາ 2019 ທີ່ນະຄອນຫຼວງປັກກິ່ງ ປະເທດຈີນ, ເຊິ່ງໃນມື້ທຳອິດຂອງການເຈລະຈາສະຫະລັດໄດ້ສົ່ງຄະນະເຈລະຈານຳໂດຍທ່ານ ເຈຟຟຣີ ເກີຣິຊ ຮອງຜູ້ແທນການຄ້າສະຫະລັດເຂົ້າຮ່ວມ ແລະ ໃນວັນທີ 14-15 ກຸມພາ 2019 ຈະມີການເຈລະຈາລະດັບສູງ ໂດຍມີທ່ານ ໂຣເບີດ ໄລທິເຊີ ຜູ້ແທນການຄ້າ ແລະ ທ່ານ ສຕີເວນ ມະນູຊິນ ລັດຖະມົນຕີກະຊວງການເງິນສະຫະລັດເຂົ້າຮ່ວມ.
ທ່ານນາງ ຊຸນຫຍິງ ໂຄສົກກະຊວງການຕ່າງປະເທດຈີນ ຖະແຫຼງຕໍ່ສື່ມວນຊົນວ່າ ຈີນຫວັງວ່າການເຈລະຈາໃນນະຄອນຫຼວງປັກກິ່ງຄັ້ງນີ້ ຈະມີຜົນດີ. ການເຈລະຈາການຄ້າຄັ້ງນີ້ເປັນຄວາມພະຍາຍາມຢັບຢັ້ງບໍ່ໃຫ້ສະຫະລັດຂຶ້ນພາສີສິນຄ້ານຳເຂົ້າຈາກຈີນ ຈາກ 10% ເປັນ 25% ເຊິ່ງກ່ອນໜ້ານີ້ທັງສອງຝ່າຍໄດ້ຢັບຢັ້ງການຂຶ້ນພາສີຮອບນີ້ໄວ້ ໂດຍກຳນົດເສັ້ນຕາຍໃນວັນທີ 1 ມີນາ 2019.
ປະທານາທິບໍດີ ໂດນັລ ທຣໍ້າ ຜູ້ນຳສະຫະລັດຍອມຮັບວ່າມີຄວາມເປັນໄປໄດ້ທີ່ການເຈລະຈາການຄ້າລະຫວ່າງຈີນ-ສະຫະລັດຈະຂະຫຍາຍເວລາອອກໄປ ຈາກກຳນົດເກົ່າວ່າທັງສອງປະເທດຈະເຮັດຂໍ້ຕົກລົງພາຍໃນວັນທີ 1 ມີນາ 2019 ເຊິ່ງເປັນວັນທີ່ສະຫະລັດຈະບັງຄັບໃຊ້ມາດຕະການປັບຂຶ້ນພາສີເປັນ 25% ແລະ ມີແນວໂນ້ມວ່າທັງ 2 ຝ່າຍ ທີ່ກຳລັງເຈລະຈາກັນໃນຮອບທີ 3 ນີ້ ໃກ້ຈະບັນລຸຂໍ້ຕົກລົງການຄ້າ ໂດຍ ທຣໍ້າ ຢ້ຳວ່າ ປະທານາທິບໍດີ ສີ ຈິນຜິງ ຕ້ອງການບັນລຸຂໍ້ຕົກລົງທີ່ສຸດ ແລະ ມີການລົມກັນດ້ວຍດີ ເຊິ່ງ ທຣໍ້າ ເຊື່ອວ່າຈະພົບກັບຜູ້ນຳຈີນອີກຄັ້ງ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: msn, news.mthai.