ໃນ​ວັນ​ທີ 8 ກຸມ­ພາ 2019 ທີ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໄດ້​ຈັດ​ພິ­ທີ​ປະ­ດັບ​ຫຼຽນ Grand Tyrolian Eagle Award ໃຫ້ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ປະ­ທານ​ກິດ​ຕິ​ມະ​ສັກ ຄະ­ນະ​ກຳ­ມະ­ການ​ບ້ານ​ຊ່ວຍ­ເຫຼືອ​ເດັກ­ນ້ອຍ ເອັສ​ໂອ​ເອັສລາວ (SOS) ໂດຍ​​ທ່ານ ກຶນ​ເທີ ປລັດ​ເດີ (Gunther Platter) ເຈົ້າ­ແຂວງ ແຂວງ​ທີ​ໂຣນ ຕາງ­ໜ້າ​ລັດ­ຖະ­ບານ​ປະ­ເທດ​ໂອ​ຕຣິດ ເປັນ​ຜູ້​ປະ­ດັບ​ຫຼຽນ​ດັ່ງ­ກ່າວ ເຊິ່ງ​ເປັນ​ຫຼຽນ​ສູງ​ສຸດ ທີ່​ລັດ­ຖະ­ບານ​ໂອ​ຕຣິດ ມອບ​ໃຫ້​ຕ່າງ­ປະ­ເທດ.

ການ​ປະ­ດັບ​ຫຼຽນ​ດັ່ງ­ກ່າວ​ໃນ​ຄັ້ງ​ນີ້ ເພື່ອ​ເປັນ​ການ​ຍ້ອງ­ຍໍ​ສັນ­ລະ­ເສີນ​ຄຸນ­ງາມ­ຄວາມ­ດີ ໃນ​ການ​ປະ­ກອບ­ສ່ວນ​ຊ່ວຍ­ເຫຼືອ​ບ້ານ ຊ່ວຍ­ເຫຼືອ​ເດັກ­ນ້ອຍ ເອັສ​ໂອ​ເອັສລາວ ເຊິ່ງ​ທ່ານ​ເປັນ​ຜູ້​ໜຶ່ງ​ທີ່​ກໍ່​ຕັ້ງ​ໂຄງ​ການ­ບ້ານ​ຊ່ວຍ­ເຫຼືອ​ເດັກ­ນ້ອຍ ເອັສ​ໂອ​ເອັສລາວ (SOS) ແຕ່​ປີ 1993 ແລະ ຕະ­ຫຼອດ​ໄລ­ຍະ 25 ປີ ຍາມ​ໃດ​ທ່ານ​ນາ­ຍົກ­ລັດ­ຖະ­ມົນ­ຕີ ກໍ່​ໄດ້​ໃຫ້​ຄວາມ​ໃກ້­ຊິດ­ຕິດ­ແທດ ຊີ້​ນຳ-ນຳ­ພາ ເອົາ­ໃຈ­ໃສ່​ພິ­ເສດ​ຕໍ່​ໂຄງ​ການ­ບ້ານ​ຊ່ວຍ­ເຫຼືອ​ເດັກ SOS ໃຫ້​ເຕີບ​ໃຫຍ່​ຂະ­ຫຍາຍ­ຕົວ ແລະ ເປັນ​ສະ­ຖານ­ທີ່​ເບິ່ງ­ແຍງ​ລ້ຽງ​ດູ ເດັກ​ກຳ­ພ້າ-ກຳ­ພອຍ ທີ່​ດ້ອຍ​ໂອ­ກາດ​ໃຫ້​ມີ​ຊີ­ວິດ​ທີ່​ດີ​ໃນ​ສັງ­ຄົມ ປັດ­ຈຸ­ບັນ​ມີ​ບ້ານ​ຊ່ວຍ­ເຫຼືອ​ເດັກ­ນ້ອຍ​ເອັສ​ໂອ​ເອັສລາວ 6 ແຫ່ງ ໃນ​ທົ່ວ​ປະ­ເທດ, ມີເດັກ ນ້ອຍຜູ້ດ້ອຍໂອກາດ ຫລາຍກ່ວາ 600 ຄົນ ໄດ້ຮັບການຊ່ວຍເຫ​ລືອ ແລະ ຮຽນຈົບຈາກບ້ານຊ່ວຍເຫລືອເດັກ SOS ແລະ ຫ​ລາຍກ່ວາພັນຄົນ ກໍາລັງໄດ້ຮັບການເບິ່ງແຍງ ດູແລໃນປັດຈຸບັນ.

ໃນ​ໂອ­ກາດ​ດຽວ​ກັນ ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ປະ­ທານ​ຄະ­ນະ​ກຳ­ມະ­ການ​ບ້ານ​ຊ່ວຍ­ເຫຼືອ​ເດັກ­ນ້ອຍ​ເອັສ​ໂອ​ເອັສລາວ ຕາງ­ໜ້າ​ລັດ­ຖະ­ບານ ສປປ ລາວ ກໍ​ໄດ້​ປະ­ດັບ​ຫຼຽນ​ໄຊ​ພັດ­ທະ­ນາ ຊັ້ນ III ໃຫ້​ແກ່​ທ່ານ ກຶນ​ເທີ ປລັດ​ເຕີ (Gunther Platter) ເຈົ້າ­ແຂວງ ແຂວງ​ທີ​ໂຣນ ປະ­ເທດ ໂອ​ຕຣິດ ເຊິ່ງ​ເປັນ​ສະ­ມາ­ຊິກ​ຊອງ​ອົງ­ການ SOS ສາ­ກົນ ແລະ ໄດ້​ປະ­ກອບ­ສ່ວນ ແລະ ໃຫ້­ການ​ສະ­ໜັບ­ສະ­ໜູນ​ດ້ານ​ວັດ­ຖຸ ແລະ ງົບ­ປະ­ມານ​ໃຫ້​ແກ່​ອົງ­ການ SOS ສາ­ກົນ ເປັນ​ຈຳ­ນວນ​ຫຼວງ­ຫຼາຍ ລວມ​ທັງ​ໂຄງ​ການ­ບ້ານ​ຊ່ວຍ­ເຫຼືອ​ເດັກ­ນ້ອຍ ເອັສ​ໂອ​ເອັ​ສລາວ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: ຂ່າວສານປະເທດລາວ