ວັນທີ 14 ກຸມພາ ຂອງທຸກໆປີ ເປັນວັນແຫ່ງຄວາມຮັກ ຫຼື ວາເລັນທາຍ ( Valentine’s Day) ເປັນເດືອນທີ່ເຕັມໄປດ້ວຍຄວາມຮັກ, ຄວາມສຸກທີ່ໝຸ່ມໆສາວໆ ຕ່າງກໍພາກັນມອບຂອງຂັວນໃຫ້ກັນ ແລະ ກັນ ແຕ່ຈະມີຂອງຂວັນແບບໃດແດ່ທີ່ຈະຕ້ອງມີທຸກປີ ແລະ ຫຼາຍໆຄົນນິຍົມມອບໃຫ້ກັນເປັນຂອງຂວັນໃນວັນແຫ່ງຄວາມຮັກ ທີ່ຈະມາເຖິງອີກບໍ່ເທົ່າໃດມື້. ມື້ນີ້, ພວກເຮົາໄດ້ສັນຫາເອົາຂອງຂັວນຄັກໆ ແລະ ປະຢັດງົບງາມໆມາໃຫ້ທ່ານໄດ້ເລືອກ ເພື່ອເປັນອີກໜຶ່ງທາງເລືອກແກ່ທ່ານ ເຊິ່ງຈະມີຫຍັງແດ່ນັ້ນໄປເບິ່ງກັນເລີຍ.

1. ດອກກຸຫຼາບ ຫຼື ດອກໄມ້ອື່່ນໆ: ເປັນສິ່ງທີ່ສາມາດໃຫ້ກັນໄດ້ຕະຫຼອດເວລາ ຫຼຶ ອາດເວົ້າໄດ້ວ່າທຸກງານຕ້ອງມີດອກໄມ້ ໂດຍສະເພາະຜູ້ຍິງຈະມັກດອກໄມ້ຫຼາຍ ດັ່ງທີ່ເຄີຍໄດ້ຍິນຕິດຫູເລີຍວ່າ: “ຜູ້ຍິງກັບດອກໄມ້ເປັນຂອງຄູ່ກັນ” ຖ້າຫາກມີໃຜຄົນໜຶ່ງໄດ້ຮັບດອກໄມ້ຈະຮູ້ສຶກດີອົກດີໃຈເປັນຢ່າງໃຫຍ່ ແລະ ບໍ່ພໍເທົ່ານັ້ນ, ຖ້າມອບໃຫ້ກັບຄົນຮູ້ໃຈກໍຈະເຮັດໃຫ້ສາຍສໍາພັນນັ້ນແຂງແກ່ນເພີ່ມຂຶ້ນອີກ ອິອິອິອິ.

2. ຊ໋ອກໂກແລັດ: ເພາະມັນເປັນການບອກຄວາມໃນໃຈ ແລະ ພໍໃຈໃນວັນແຫ່ງຄວາມຮັກ ຖ້າໝຸ່ມໆສາວໆຄົນໃດມອບໃຫ້ກັບຄົນທີ່ເຮົາຮັກ ຫຼື ຄົນທີ່ກໍາລັງແອບຮັກຢູ່ ເຂົາເຈົ້າກໍຈະເອົາຊັອກໂກແລັດໄປມອບໃຫ້ທ່ານເຊັ່ນກັນ ເພື່ອຖືເປັນການຕອບແທນ ຫຼື ຈະເອີ້ນວ່າເປັນມາລະຍາດທີ່ດີກໍໄດ້.

3. ເສື້ອຄູ່: ເອີ້ນໄດ້ວ່າເປັນອີກໜຶ່ງຂອງຂວັນຍອດຮີດ ທີ່ຢູ່ຄູ່ກັບເທສະການແຫ່ງຄວາມຮັກນີ້ມາດົນນານ ຖ້າໝຸ່ມໆສາວໆ ຄົນໃດທກຳລັງຊອກຫາເສື້ອງາມໆນຸ່ງອອກໄປທ່ຽວຫຼິ້ນນໍາກັນໃນວັນແຫ່ງຄວາມຮັກນີ້ ລອງຊື້ເສື້ອຄູ່ໄປເປັນຂອງຂວັນໃຫ້ກັບຄູ່ຂອງຕົນເອງໄດ້ເດີ້ ຮັບຮອງວ່າຄູ່ເຈົ້າຈະກາຍເປັນຄູ່ທີ່ຄົນອື່ນອິດສາຕາຮ້ອນກໍເປັນໄດ້!.

4. ແຫວນຄູ່: ເປັນຂອງຂວັນທີ່ຂາດບໍ່ໄດ້ເລີຍ ສໍາລັບວັນແຫ່ງຄວາມຮັກໃນເດືອນກຸມພາ ທີ່ຈະມາເຖິງນີ້ ເອີ້ນໄດ້ວ່າເປັນຂອງຂວັນຍອດຮິດສໍາລັບຄູ່ຮັກສ່ວນໃຫຍ່ເລີຍ ເພາະວ່າສາມາດສື່ເຖິງຄວາມເປັນຄູ່ຄອງໄດ້ຢ່າງດີ ໝຸ່ມໆ ອາດຈະໃຊ້ໂອກາດນີ້ຂໍສາວຮູ້ໃຈແຕ່ງງານເລີຍ.

5. ຕຸກກະຕາ: ເປັນການແທນໃຈແທນກາຍ ເພາະຕຸກກະຕາປຽບເໝືອນຕົວແທນຂອງກັນ ແລະ ກັນ, ເປັນສິ່ງທີ່ໃຫ້ກັນໄດ້ທຸກເທສະການຢູ່ແລ້ວ ແຕ່ພິເສດສໍາລັບວັນແຫ່ງຄວາມຮັກຄົງຕ້ອງເລືອກໂຕທີ່ໜ້າຮັກ ແລະ ເປັນທີ່ປະທັບໃຈຂອຜູ້ຮັບ.  ນອກຈາກນີ້, ອາດຈະມີການໃສ່ຮູບ ຫຼື ອັດສຽງເພີ່ມໄປໃຫ້ເບິ່ງເປັນພິເສດຍິ່່ງຂຶ້ນຕື່ມອີກ.

6. ກາດອວຍພອນ: ອັນນີ້, ເປັນຂອງຈໍາເປັນຄວບຄູ່ໄປກັບດອກໄມ້ ແລະ ຊັອກໂກແລັດ ເລືອກຕາມແບບທີ່ໃຈມັກ, ຂຽນຂໍ້ຄວາມຕາມແບບທີ່ຍາກສື່ໃຫ້ຄົນທີ່ຮັບໄດ້ອ່ານແລ້ວເຂົ້າໃຈທັນທີ ແຖມຫາຊື້ບໍ່ຍາກ ແລະ ລາຄາກໍບໍ່ແພງອີກດ້ວຍ ຖ້າໃຜທີ່ຫາໄອເດຍທີ່ຈະເຮັດກາດອວຍພອນບໍ່ໄດ້ສາມາດຊອກເບິ່ງໄດ້ທີ່ Google ແລະ YouTube.

7. D.I.Y (Do it Yourself): ເປັນອີກໜຶ່ງທາງເລືອກໃຫ້ກັບຫຼາຍໆຄົນ ຫຼາຍໆ ຄູ່ຮັກ ເຊິ່ງຂອງຂວັນ D.I.Y ຖືເປັນຂອງຂວັນແທນໃຈໄດ້ເປັນຢ່າງດີເລີຍ ເພາະເປັນຂອງແທນໃຈທີ່ເຮັດເອງກັບມືເພື່ອຄົນພິເສດສຸດໆ.

8. ເຄັກ ຫຼື ຄຸກກີ້: ສໍາຫຼັບພໍ່ບ້ານ-ແມ່ບ້ານ ທີ່ມີສືມືໃນການເຮັດອາຫານ ຫຼື ເຂົ້າໜົມ ເຈົ້າຕ້ອງລອງປ່ຽນຂອງຂວັນຈາກການຊື້ສິ່ງອື່ນໆ ມາເປັນເຂົ້າໜົມເຄັກ ຫຼື ຄຸກກີ້ ເພື່ອເປັນການເຊີໄພ ໃຫ້ກັບຄົນທີ່ທ່ານຮັກ!!!

9. ກະເປົາ: ເປັນສິ່ງທີ່ຂາດບໍ່ໄດ້ເລີຍ ຖ້າຫາກວ່າຜູ້ຊາຍຫຼາຍໆ ຄົນທີ່ກໍາລັງຊອກຊື້ຂອງຂວັນໃຫ້ກັບຄົນທີ່ທ່ານຮັກ. ການຊື້ກະເປົາໃຫ້ສາວໆ ນັ້ນ ເຂົາເຈົ້າສາມາດໃຊ້ ແລະ ພົກພາຕິດຕົວໄປຕະຫຼອດເວລາ (ຖ້າກະເປົາໃບນັ້ນຖືກໃຈລາວເດິ!)5555

10. ຜະລິດຕະພັນເຄື່ອງສໍາອາງ ຫຼື ບໍາລຸງຜີວ: ເປັນຜະລິດຕະພັນເສີມຄວາມງາມທີ່ຢູ່ກັບຜູ້ຍິງມາແຕ່ດົນ ອະໆ ຍຸກສະໄໝນີ້ຜູ້ຊາຍກໍມັກແຕ່ງມັກທາຄືກັນເດິ ເພາະສະນັ້ນຖ້າຈະເລືອກຊື້ເປັນຂອງຂັວນໃຫ້ກັບຜູ້ຍິງ ຫຼື ຜູ້ຊາຍຂອງທ່ານຄົງຈະບໍ່ແປກ ແຖມຍັງຈະເຮັດໃຫ້ຜູ້ຮັບດີໃຈ ເພາະໄດ້ມອບໃຫ້ແລ້ວເຂົາກໍຕ້ອງໃຊ້ແນ່ນອນ ແລະ ທີ່ສໍາຄັນຍັງບົ່ງບອກວ່າເຂົາເຈົ້າໃສ່ໃຈໃນການດູແລຮັກສາຮ່າງກາຍ ຫຼື ຜິວພັນຂອງທ່ານ ເດະ! ເຂົາຮັກແຫຼະຫັນຈຶ່ງມອບໃຫ້ເປັນຂອງຂັວນ ອິອິອິ.

ຂອງຂວັນ 10 ຢ່າງນີ້ ເປັນພຽງຕົວຢ່າງເພື່ອໃຫ້ມູ່ເພື່ອນທີ່ຍັງຄິດບໍ່ອອກວ່າຈະມອບຫຍັງດີໃຫ້ກັບຄົນທີ່ທ່ານຮັກ ຫຼື ແອບຮັກ ໃນວັນແຫ່ງຄວາມຮັກ. ແຕ່ຖ້າບໍ່ຮູ້ຈະເລືອກອັນໃດດີ ໝູ່ເພື່ອລອງກົດແຊຣ໌ ແລະ ແທັກໃຫ້ກັບຄົນທີ່ທ່ານຈະມອບໃຫ້ກໍໄດ້ເຊັ່ນກັນ ແຕ່ທີ່ແນ່ນອນ ສິ່ງຂອງ ຫຼື ໄອເດຍທີ່ທ່ານນໍາມາແຊຣ໌ ນັ້ນອາດຈະເປັນທີ່ຖືກໃຈຂອງເຂົາເຈົ້າກໍເປັນໄປໄດ້.

• ຄວາມໝາຍຂອງດອກໄມ້ທີ່ມອບໃຫ້ກັນ ແທນຄວາມຮູ້ສຶກ ຫຼື ຄໍາເວົ້າ
• 10 ໄອເດຍມອບຂອງຂວັນໃຫ້ຄົນທີ່ທ່ານຮັກໃນວັນວາເລັນທາຍ
• ຂອງຂັວນ10 ຢ່າງທີ່ບໍ່ຄວນໃຫ້ກັນໃນວັນວາເລັນທາຍ

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: medthai.com, sanook.com