ສຳນັກຂ່າວຕ່າງປະເທດລາຍງານວ່າ ນັກວິທະຍາສາຊາວຣັດເຊຍໄດ້ຄົ້ນພົບຂໍ້ມູນ ແລະ ເສັ້ນທາງຂອງດາວເຄາະນ້ອຍ ອະໂພຟິສ (Apophis 99942) ຫຼັງຈາກທີ່ໄດ້ເຮັດການສຶກສາຄົ້ນຄວ້າມາຫຼາຍປີ ເນື່ອງຈາກວ່າດາວເຄາະນ້ອຍດວງນີ້ມີຄວາມສ່ຽງເປັນໄພຕໍ່ໂລກ.
ຫຼ້າສຸດນັກວິທະຍາສາດ ແລະ ນັກວິໄຈຈາກມະຫາວິທະຍາໄລລັດເຊນປີເຕີເບີຣກຂອງຮັດເຊຍ ໄດ້ພົບຂໍ້ມູນວ່າ ດາວເຄາະນ້ອຍອະໂພຟິສ ເຄື່ອນຕົວຜ່ານໂລກ ແລະ ດວງຈັນໃນໄລຍະຄ່ອນຂ້າງໃກ້ໃນປີ 2029 ມັນຍັງຈະໂຄຈອນຍ້ອນກັບມາອີກ ດ້ວຍວິຖີການຫັກປ່ຽນທິດຂອງເສັ້ນໂຄຈອນ ເນື່ອງຈາກເຂ້າໃກ້ແຮງດຶງດູດຂອງໂລກ ແລະ ດວງຈັນ. ຫຼັງຈາກໂຄຈອນເກືອບເຂົ້າໃກ້ໂລກໃນປີ 2029 ນີ້ແລ້ວ ມັນຍັງຈະກັບມາອີກໃນປີ 2036, 2044, 2051, 2060 ແລະ 2068 ທີ່ນັກວິທະຍາສາດກຳລັງວິໄຈເສັ້ນທາງການໂຄຈອນໂດຍລະອຽດ ເພາະອາດຈະເປັນໄພຕໍ່ໂລກໃນອານາຄົດອັນໃກ້ນີ້ໄດ້.
ສຳລັບດາວເຄາະນ້ອຍອະໂພຟິສ ຖືກຕັ້ງຊື່ຕາມເທບແຫ່ງການທຳລາຍຂອງຕຳນານອີຢິບບູຮານ ດາວເຄາະມີຂະໜາດໃຫຍ່ປະມານ 3 ເດີ່ນບານ ຖືກຄົ້ນພົບຄັ້ງທຳອິດເມື່ອປີ 2004 ອົງການນາຊາ ໄດ້ຈັດໃຫ້ດາວເຄາະນ້ອຍນີ້ມີແນວໂນ້ມເປັນໄພຮຸກຮານຕໍ່ໂລກ ເນື່ອງຈາກໃນອີກ 10 ປີຕໍ່ໜ້າ ໃນວັນທີ 13 ເມສາ 2029 ດາວເຄາະນ້ອຍຈະເຄື່ອນຜ່ານໂລກ ແລະ ດວງຈັນ ໃນໄລຍະຫ່າງ 31.300 ກິໂລແມັດ ແຕ່ມີການວິເຄາະພົບວ່າມັນຍັງບໍ່ທັນເປັນໄພຕໍ່ໂລກເທື່ອ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook