ໃນໄລຍະຜ່ານມາ ຫຼື ປັດຈຸບັນ ບາງຂົງເຂດຢູ່ປະເທດເຮົາຍັງມີການນຳໃຊ້ເງິນຕາຕ່າງປະເທດ ຢ່າງຊະຊາຍ ການແຈ້ງລາຄາສິນຄ້າ ແລະ ການບໍລິການ, ການຮັບຊຳລະດ້ວຍເງິນຕາຕ່າງປະເທດຍັງເຫັນກັນຢ່າງເປີດເຜີຍ.
ຈາກກໍລະນີເມື່ອທ້າຍປີທີ່ຜ່ານມາ (20/12/2018) ມີນັກທ່ອງທ່ຽວສາວຄົນລາວພ້ອມດ້ວຍຄູ່ຮັກໄດ້ເດີນທາງໄປທ່ຽວກາສິໂນ ດອນ 20 ເຂດເສດຖະກິດພິເສດ ເມືອງ ຕົ້ນເຜິ້ງ ແຂວງ ບໍ່ແກ້ວ ແລະ ໄດ້ພາກັນເຂົ້າໄປທີ່ຮ້ານ KFC ເພື່ອສັ່ງອາຫານ ເມື່ອຮອດເວລາຈ່າຍເງິນ ພະນັກງານຮ້ານໄດ້ປະຕິເສດທີ່ຈະຮັບເງິນກີບໃນການຊຳລະຄ່າອາຫານ ໂດຍໃຫ້ນາງຈ່າຍເປັນເງິນບາດ ຫຼື ເງິນຢວນແທນ. ນອກຈາກນີ້, ພາຍໃນຕະຫຼາດການຊື້-ຂາຍສິນຄ້າ ບໍ່ວ່າຈະເປັນການຕິດລາຄາ ຫຼື ການຊຳລະສິນຄ້າ ແມ່ນຈະນຳໃຊ້ແຕ່ເງິນບາດ ແລະ ເງິນຢວນເທົ່ານັ້ນ.
ລາຍລະອຽດເບິ່ງວິດີໂອດ້ານລຸ່ມ:
https://www.facebook.com/ASEANLookThroughThailand/videos/757098044646034/?__xts__[0]=68.ARBSmQguRUusGZU-htie4680QaCnKRRpNj7YtGcJh6vRLu33-zCNT1ToyzzFWI60CWlhVFAwaQXRUsqfvy32wpov6LIPKBgLv-IjYuiDIMR640PrMBxjDd_sUDChtb06fmat7Cb4qZnWtoc0EETqDDd6olAyv5g0IQvjVtcUHGHwR_EDn1CgVzm_c69b0t_MtAzt6MlBBKZ_yjPgeJ_qzbAir8rbGEYqBKuy-JK9-jQajErzjlL0JMkpV2oHPX3rj8M0gEVrdWZjPZrtljzV3kudpIDnA-hFFVY8oo5tAhtzhQV4mIZ3hrCMSJlk9vAXx4t09sg_gZYzsy–L0tur297OKhAOGmHl9U&__tn__=-R
ຈາກເຫດການທີ່ເກີດຂຶ້ນນີ້ ມັນສະທ້ອນໃຫ້ເຫັນບົດບາດທາງສັງຄົມ ຄ່ານິຍົມຂອງຄົນໃນຂົງເຂດນັ້ນໃນການຍົກສູງຄຸນຄ່າເງິນຕາຕ່າງປະເທດໃຫ້ເໜືອຄຸນຄ່າເງິນກີບລາວ ໂດຍສະເພາະໃນຂົງເຂດບ້ານ, ເມືອງ ທີ່ຕິດກັບຊາຍແດນໂດຍແມ່ນຈະເຫັນເປັນເລື່ອງປົກກະຕິຍ້ອນເຫດຜົນທີ່ວ່າການໃຊ້ຈ່າຍເງິນຕາຕ່າງປະເທດແທນເງິນກີບລາວໃນການຊຳລະ ຫຼື ຊື້-ຂາຍສິນຄ້າມັນເປັນເລື່ອງທີ່ສະດວກສະບາຍ ແຕ່ປະເດັນໃຫຍ່ທີ່ຮ້າຍແຮງທີ່ສຸດແມ່ນກໍລະນີທີ່ບໍ່ສາມາດນຳໃຊ້ເງິນກີບລາວໃນເຂດແຜ່ນດິນລາວໄດ້ມັນເປັນເລື່ອງທີ່ໜ້າເສົ້າໃຈ ແລະ ເປັນເລື່ອງທີ່ຄົນລາວທຸກຄົນຄວນຄິດທົບທວນກັນຄືນໃໝ່.
ອີງຈາກການຖອດຖອນບົດຮຽນຕົວຈິງເມື່ອເວລາຄົນລາວເດີນທາງເຂົ້າໄປປະເທດເພື່ອນບ້ານ ຄົນລາວແມ່ນຈຳເປັນຕ້ອງແລກປ່ຽນເງິນສະກຸນຂອງປະເທດນັ້ນ ເນື່ອງຈາກວ່າບໍ່ສາມາດນຳເງິນກີບໄປໃຊ້ຈ່າຍໃນປະເທດເຂົາເຈົ້າໄດ້.
ປະເທດລາວເອງໃນໄລຍະທີ່ຜ່ານກໍ່ມີການຊຸກຍູ້ສົ່ງເສີມໃຫ້ຄົນລາວນຳໃຊ້ເງິນກີບລາວ ໃນການແຈ້ງລາຄາສິນຄ້າ ແລະ ການບໍລິການ, ການຊຳລະ, ການລົງໂຄສະນາຂາຍສິນຄ້າເປັນເງິນກີບ ແລະ ໄດ້ອອກດຳລັດວ່າດ້ວຍການຄຸ້ມຄອງເງິນຕາຕ່າງປະເທດ ແລະ ການສົ່ງເສີມການນຳໃຊ້ເງິນກີບ, ສະບັບເລກທີ 150/ນຍ, ລົງວັນທີ 18/05/2007. ໃນມາດຕາ 2 ວັນ 2.1 ໃຫ້ບັນດາກະຊວງ, ອົງການທຽບເທົ່າ, ເຈົ້າຄອງນະຄອນ ແລະ ເຈົ້າແຂວງໃນທົ່ວປະເທດເພີ່ມທະວີການໂຄສະນາເຜີຍແຜ່ ການສຶກສາອົບຮົມກ່ຽວກັບລະບຽບການຄຸ້ມຄອງເງິນຕາຕ່າງປະເທດເພື່ອເຮັດໃຫ້ສັງຄົມຮັບຮູ້ ແລະ ເຫັນຄວາມສຳຄັນໃນການປົກປັກຮັກສາ ແລະ ຍົກສູງຄຸນຄ່າຂອງເງິນກີບ, ຄຸ້ມຄອງເງິນຕາຕ່າງປະເທດ, ຈຳກັດ ແລະ ກ້າວໄປເຖິງຢຸດຕິການນຳໃຊ້ເງິນຕາຕ່າງປະເທດຢ່າງຊະຊາຍ ໃນ ສ ປປລາວ, ແລະ ວັກ 2.3 ໃຫ້ບັນດາວິສາຫະກິດ, ບັນດາຮ້ານ ທັງພາກລັດ ແລະ ເອກະຊົນ ປະກາດ ແລະ ຕິດລາຄາສິນຄ້າ ແລະ ຄ່າບໍລິການເປັນເງິນກີບ.
ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: laoofficialgazette.gov.la
ວິດີໂອປະກອບຂ່າວ: ASEAN “มอง” ไทย