ສຳນັກຂ່າວຕ່າງປະເທດລາຍງານຈາກນະຄອນຫຼວງກົວລາລຳເປີ ປະເທດມາເລເຊຍ ເມື່ອວັນທີ 06 ມັງກອນ 2019 ວ່າ ຖະແຫຼງການຈາກສຳນັກພຣະລາຊະວັງແຫ່ງຊາດມາເລເຊຍ ເມື່ອວັນອາທິດທີ່ຜ່ານມາລະບຸວ່າ “ການສະລະບັນລັງຂອງສົມເດັດພຣະລາຊາທິບໍດີມູຮໍາມັດ ທີ 5 ຜູ້ປົກຄອງລັດກຣັນຕັນ ກະສັດພຣະອົງທີ 15 ຂອງມາເລເຊຍ ໃຫ້ມີຜົນໃນທັນທີ ໂດຍບໍ່ໃຫ້ເຫດຜົນ ແລະ ເຈົ້າໜ້າທີ່ສຳນັກພຣະລາຊະວັງກໍບໍ່ໄດ້ຕອບຄຳຖາມກັບສື່ມວນຊົນໃນເລື່ອງນີ້”.

ຄວາມເຄື່ອນໄຫວເກີດຂຶ້ນຫຼັງຈາກສຸລາຕານມູຮໍາມັດທີ 5 ມີພຣະຊົນພັນສາ 49 ພັນສາ ໄດ້ລາພັກຈາກການປະກອບພາລະກິດເປັນເວລາ 2 ເດືອນ ເລີ່ມຕັ້ງແຕ່ເດືອນພະຈິກ 2018 ເປັນຕົ້ນມາ ເພື່ອຮັກສາສຸຂະພາບ ແລະ ໃນຊ່ວງເວລານັ້ນມີລາຍງານຂາ່ວທີ່ບໍ່ໄດ້ຮັບການຢືນຢັນວ່າ ພຣະອົງໄດ້ອະພິເສກສົມຣົດກັບອະດີດເທພີສາວງາມໄວອາຍຸ 25 ປີ ຊາວຣັດເຊຍ.

ຖະແຫຼງການຂອງພຣະລາຊະວັງມາເລເຊຍກ່າວອີກວ່າ “ສົມເດັດພຣະລາຊາທິບໍດີໄດ້ກ່າວແກ່ປະຊາຊົນຊາວມາເລເຊຍ ໃຫ້ມີຄວາມສາມັກຄີ ອົດທົນ ແລະ ເຮັດວຽກຮ່ວມກັນຕໍ່ໄປ” ນີ້ຖືເປັນຄັ້ງປະຫວັດສາດຂອງປະເທດ ທີ່ກະສັດສະລະບັນລັງກ່ອນຄົບວາລະໝູນວຽນ 5 ປີ.

ມາເລເຊຍມີສຸລາຕານຜູ້ປົກຄອງ 9 ລັດ ໝູນວຽນກັນຂຶ້ນເປັນກະສັດວາລະ 5 ປີ ການຄັດເລືອກສົມເດັດພຣະລາຊາທິບໍດີອົງຕໍ່ໄປ ຕັດສິນຈາກການລົງມະຕິຂອງ “ສະພາຜູ້ປົກຄອງ” ທີ່ປະກອບດ້ວຍສຸລາຕານທັງ 9 ລັດ, ສຳລັບສຸລາຕານ ມູຮໍາມັດທີ 5 ຜູ້ປົກຄອງລັດກຣັນຕັນ ທາງພາກຕະເວັນອອກສຽງເໜືອ ໄດ້ເຂົ້າພິທີແຕ່ງຕັ້ງໃນເດືອນທັນວາ 2016 ກາຍເປັນພຣະມະຫາກະສັດທີ່ມີພຣະຊົນພັນສານ້ອຍທີ່ສຸດຂອງປະເທດເທົ່າທີ່ເຄີຍມີມາ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews.